Welcome to Radio Erena!
ሱዳን፣ ካብ እስራኤል ንዝተጠረዘ ዜጋኣ ብክሲ ስለያ ኣብ ቀይዲ የእትያ
Radio Erena: March 24, 2014
ሱዳን ንእስራኤል ክስሊ ጸኒሑ ዝበለቶ ዜጋኣ ኣብ ቀይዲ ከምዘእተወት ኣል ኢንጢባህ ዝተባህለት ጋዜጣ ብምጥቓስ ዮርሳሌም ፖስት ሓቢራ።
እቲ መንነቱ ብጽኑር ዘይተሓበረ ሱዳናዊ፣ ቅድሚ 10 ዓመት ኣብ እስራኤል ብስደት ክነብር ዝጸንሐ ኮይኑ፣ ካብቶም ኣብ ዝሓለፈ እዋናት እስራኤል ናብታ ሃገር ዝጠረዞቶም ሱዳናውያን ዜጋታት ሓደ ምዃኑ'ዩ እቲ ጋዜጣ ብተወሳኺ ሓቢራ።
ሱዳን ኣብ ልዕሊ'ቶም ካብ እስራኤል ዝተጠረዙ ዜጋታታ ጽኑዕ ምክትታል ከምእተካይድ ዝጠቐሰ ዮርሳሌም ፖስት፣ እዚ ብክሲ ስለያ ተጠርጢሩ ኣብ ቀይዲ ኣትዩ ዘሎ ጽኑዕ ምጽንጻንን ምክትታልን ክካየደሉ ዝጸንሐ'ዩ ክብል ኣስሚርሉ።
እቲ ብኣባላት ጸጥታ ሱዳን ተታሒዙ ኣብ ቀይዲ ኣትዩ ዘሎ ሱዳናዊ፣ ወትሃደራዊ ዒላማታን ካልእ ኣገደስቲ ትካላት ሱዳንን እናተኸታተለ ናብ ኣባላት ስለያ እስራኤል ከሰጋግር ጸኒሑ ዝብል ክሲ'ዩ ተመስሪትሉ ዘሎ።
ኤርትራውያን ዝርከብዎም 21 ሰራሕተኛታት ዝነበርዋ ዘይሕጋዊ ነዳዲ ኣብ ምምልላስ ዝነበረት ናይ ሊብያ መርከብ ኣብ ቀይዲ ኣትያ
Radio Erena: March 21, 2014
ኤርትራውያን ዝርከብዎም 21 ሰራሕተኛታት ዝነበርዋ፣ ነዳዲ እተመላልስ ናይ ሊብያ መርከብ፣ ብዘይሕጋዊ መንገዲ ነዳዲ ኣብ ምምልላስ ኣብ ዝነበረትሉ ኣብ ቀይዲ ኣትያ ከምዘላ ሚኒስትሪ ምክልኻል ኣመሪካ ኣፍሊጡ።
እታ Morning Glory ዝተሰምየት ዓባይ መርከብ፣ ካብ ወደባቲት ከተማ ዲድራ ናይ ሊብያ ተበጊሳ ናብ ዘይተፈልጠ ቦታ እናምርሐት እንከላ’ያ ብፍሉያት ኣሃዱ ሓይሊ ባሕሪ ኣመሪካ ኣብ ትሕቲ ቁጽጽር ውዒላ።
ተቓወምቲ ደቡብ ሱዳን ካብ መንግስቲ ኤርትራ ዝኾነ ሓገዝ ከምዘይረኸቡ ኣፍሊጦም
Radio Erena: March 21, 2014
ብሬክ ማሻር ዝምራሕ ተቓዋሚ ሓይሊ ደቡብ ሱዳን ፣ ካብ መንግስቲ ኤርትራ ዝኾነ ሓገዝ ከምዘይረኸበ ኣፍሊጡ።
ኣብ ኣዲስ ኣበባ ኣብ ዝካየድ መስርሕ ስምምዕ ሰላም ካብ ዝሳተፉ ዘለዉ ወከልቲ ተቓወምቲ ደቡብ ሱዳን ፑት ካንግ ኮል ብዛዕባ’ዚ ብጎረባብቲ ኤርትራ ብፍላይ ድማ ብኢትዮጵያ ዝቐረብ ዘሎ ክሲ ኣመልኪቱ ንሱዳን ትሪቡን ኣብ ዝሃቦ ምላሽ፣ ምስ ኤርትራ ዝኾነ ዝምድና የብልናን። ዝተዘራረብናዮ ነገረ’ውን የለን ክብል’ዩ ገሊጹ።
እንተኾነ ኤርትራ ከም ኩለን ሃገራት ኣፍሪቃ ብዛዕባ ኩነታት ደቡብ ሱዳን ዘለዋ ትዕዝብቲ ናይ ምግላጽ መሰል ከምዘለዋ ኣረዲኡ።
ሜ.ጀነራል ፍሊጶስ ወልደዮሃንስ ሓለቓ ስታፍ ሓ.ም. ኤርትራ ኮይኑ ተመዚዙ፣ ማእከሎት ኣዘዝቲ ሰራዊት ድማ የዕዘምዝሙ
Radio Erena: March 20, 2014
ድሕሪ ሞት ሜጀር ጀነራል ገረዝግሄር ዓንደማርያም ውጩ፣ ሜጄር ጀነራል ፊሊጶስ ወልደዮሃንስ ሓለቓ ስታፍ ሓይልታት ምክልኻል ኤርትራ ኮይኑ ምምዛዙ፣ ሓያሎ ማእከሎት ኣዘዝቲ ሰራዊት ምዕዝምዛማት የስምዑ ከምዘለዉ ምንጭታት ሬድዮ ኤረና ሓቢሮም።
ሜጄር ጀነራል ውጩ፣ ብጽኑዕ ሓሚሙ ኣብ ዝነበረሉ፣ ሓለቓ ስታፍ ሓይልታት ምክልኻል ኤርትራ ኮይኑ ምምዛዙ፣ እቲ ወትሃደራዊ ጽፍሒ ብዙሕ ኣገዳስነት ከምዘይጸንሖ ዘነጽር’ዩ ዝበሉ ነቲ ኩነታት ዝተንተንቱ ሓያሎ ኤርትራውያን ድማ፣ ቅድሚ ውጩ’ውን ኣዛዚ ሓይሊ ምድሪ ነበረ ሜጀር ጀነራል ጠዊል ኣብ እዋን ሕማሙ ኣብቲ ጽፍሒ ተመዲቡ ምንባሩ ኣዘኻኺሮም።
ስድራቤት ስዉእ ስርሒት ፎርቶ ኮለነል ወዲ ዓሊ ናብ ኖርወይ ተጣይሰን
Radio Erena: March 20, 2014
ስድራ ቤት ናይቲ ኣብ ስርሒት ፎርቶ 21 ጥሪ 2013 ዝተሰውአ ኮለነል ስዒድ ዓሊ ሕጃይ ብሓገዝ ላዕለዋይ ኮሚሽን ስደተኛታት ውድብ ሕቡራት ሃገራትን መንግስቲ ኢትዮጵያን ናብ ኖርወይ ከምዝተጣየሱ ምንጭታት ሬድዮ ኤረና ካብ ኣዲስ ኣበባ ሓቢሮም።
በዓልቲ ቤቱን ክልተ ደቁን ነቲ ኣብ ፎርቶ ዝተኻየደ ስርሒት ዝተሰውአ ወዲ ዓሊ፣ ናብ ኢትዮጵያ ናብ ስደት ድሕሪ ምምርሐን ኣብ ወጻኢ ሃገራት ዝነብሪኡ ኤርትራውያንን ካልኦት ጉዱሳትን ሞራላውን ገንዘባውን ሓገዝ ክገብሩለን ከምዝጸንሑ ዝፍለጥ’ዩ።