Welcome to Radio Erena!
ኣመሪካ ኣብ ሶማል ብዘካየደቶ ደብዳብ ሓያሎ ሰባት ተቐቲሎም
Radio Erena: 02 February 2015
ኣመሪካ ትማሊ ሰንበት ኣብ ሶማል ብዘካየደቶ ናይ ሰብ ኣልቦ ነፈርቲ ደብዳብ ሓያሎ ሰባት ከምዝተቐትሉ ተሓቢሩ።
እቲ ዲንሶር ኣብ ዝተባህለ ካብ ሞቋድሾ 237 ኪሎሜተር ንምዕራብ ርሒቁ ኣብ ዝርከብ ቦታ ዝተኻየደ ደብዳብ፣ መራሕቲ ኣልሸባብ ዒላማ ዝገበረ ምንባሩ'ዩ ተገሊጹ።
ኣብቲ መራሕቲ ኣልሸባብ ኔሮም ዝተባህለ ገዛ ዒላማ ዝገበረ ደብዳብ፣ ናይ ዝተቐትሉ መራሕቲ ይኹን ኣባላት ኣልሸባብ ብዝሒ ክፍለጥ እኳ እንተዘይተኻእለ፣ ሓያሎ ሰባት ከምዝሞቱ ግና ናይ ዓይኒ መሰኻኽር ንኣገልግሎት ዜና ፈረንሳ ጠቒሶም።
ፓርላማ ብሪጣንያ ኣብ ጉዳይ ኤርትራን ኢትዮጵያ ተኻቲዑ
Radio Erena : 30 January 2015
ፓርላማ ብሪጣንያ ብ27 ጥሪ ኣብ ዘካየዶ ኣኼባ ብዛዕባ ህሉው ኩነታት ኤርትራን ኢትዮጵያን ዘትዩ።
እቲ ፓርላማ ኣብ ዘተኡ፣ ብዛዕባ ዋሕዚ ኤርትራውያን ስደተኛታትን ኣብ ኤርትራ ዘሎ ኩነታት ሰብኣዊ መሰላትን ብምትኳር ብዝተፈላለዩ ኣባላት ናይቲ ፓርላማ ንዝቐረቡ ሓሳባት ተኻቲዕሎም።
ብሪጣንያ፣ ዋሕዚ ስደተኛታት ንምግታእ ብፍላይ ነቲ ምስ ፈረንሳ ዘዳውባ ክፋል ብጽኑዕ ዓጽያቶ እኳ እንተላ፣ ናብታ ሃገር ንምዝእታው ንዝኸኣሉ ኤርትራውያን ስደተኛታት ብፍሉይ ከም ሓተቲ ፖለቲካዊ ዑቕባ ከምእትቕበሎም ዝፍለጥ'ዩ።
ፕረዚደንት ሳልቫኪር ብሃንደበታዊ ሕማም ኣብ ኣዲስ ኣበባ ናብ ዝርከብ ሆስፒታል ድሕሪ ምእታዉ፣ ጥዕንኡ ተመሓይሹ ኣብ ዋዕላ ሕብረት ኣፍሪቃ ክሳተፍ ክኢሉ
Radio Erena : 30 January 2015
ኣብ መበል 24 ዋዕላ መራሕቲ ሃገራት ሕብረት ኣፍሪቃ ንምስታፍ ናብ ኣዲስ ኣበባ ዝኣተወ ፕረዚደንት ደቡብ ሱዳን ሳልቫኪር ሚያርዲት ብሰንኪ ሃንደበታዊ ሕማም ሆስፒታል ኣትዩ ድሕሪ ምጽናሕ፣ ናብቲ ዋዕላ ክምለስ ከምዝኸኣለ ተሓቢሩ።
እቲ ፕረዚደንት፣ ብሰሉስ 27 ጥሪ ናብ ኣዲስ ኣበባ ድሕሪ ምእታዉ ንጽባሒቱ ሮቡዕ ብሰንኪ ዘጋጠሞ ሃንደበታዊ ሕማም ኣብታ ከተማ ናብ ዝርከብ ሆስፒታል ብህጹጽ ከምዝተወስደ ዝሓበራ ማዕከናት ዜና ጠንቂ ሕማሙ ብንጹር ከምዘይተፈልጠ ኣመልኪተን።
63 ዓመት ዝዕድሚኡ ፕረዚደንት ኪር ናብ ሆስፒታል ዝተወስደሉ ምኽንያት መድመይቲ ኣፍንጫ ጥራይ ምንባሩ ዝሓበሩ ሰበ ስልጣን ደቡብ ሱዳን ከኣ፣ እቲ ፕረዚደንት ካብ ሆስፒታል ክሳብ ዝምለስ እቲ ዋዕላ ንምጅማር ከምዝተደናጎየ ኣረጋጊጾም።
ፊንላንድ ኣብ ስልጠና ላዕለዋይ ትምህርቲ ዝውዕል 1.5 ሚልዮን ዮሮ ሓገዝ ኣበርኪታ
Radio Erena: 29 January 2015
ፊንላንድ ንመንግስቲ ኤርትራ እትገብሮ ዘላ ሓገዝ ክትቕጽሎ ምዃና ተገሊጹ።
እዚ ዝተገልጸ፣ ፊንላንድ ብመንገዲ ፊን ቸርች ኤይድ ዝተባህላ ትካል ስልጠና ላዕለዋይ ትምህርቲ ንምሃብ ምስ መንግስቲ ኤርትራ ስምምዕ ድሕሪ ምኽታሙ'ዩ።
ብመሰረት እቲ ኣብ መፋርቕ ወርሒ ጥሪ ኣብ ኣስመራ ዝተኸተመ ስምምዕ፣ ብምወላ መንግስቲ ፊንላድን ክሳብ 2017 ዝቕጽል ናይ መማህራንን ካልእ ላዕለዋይ ደረጃ ስልጠናን ክወሃብ'ዩ።
ካብ ቱርኪ ናብ ግሪኽ ንምዝጋር ዝፈተኑ 17 ኤርትራውያን ዝርከብዎም 71 ስደተኛታት ካብ ምጥሓል ድሒኖም
Radio Erena: 29 January 2015
ካብ ቱርኪ ናብ ግሪኽ ብመንገዲ ባሕሪ ዝሰግሩ ዝነበሩ 17 ኤርትራውያን ዝርከብዎም 71 ስደተኛታት ካብ ናይ ምጥሓል ሓደጋ ከምዝደሓኑ ኣገልግሎት ዜና ኩዌት ሓቢሩ።
እቶም ካብ ዝተፈላለያ ኣብ ገማግም ባህሪ ዝርከባ ንኣሽቱ ከተማታት ተበጊሶም ናብ ግሪኽ ንምስጋር ዝሓለኑ ስደተኛታት ነዊሕ ከይተጓዕዙ ብዘጋጠሞም ሓደጋ'ዮም ብሓለዋ ገማግም ባሕሪ ቱርኪ ክኢሎም።