ባዕሉ ብዝሰንዓ ጃልባ ካብ ሆላንድ ናብ ብሪጣንያ ክሰግር ዝፈተነ ኤርትራዊ ናብ ኢጣልያ ክስጎግ’ዩ

Radio Erena: 11 June 2019

ባዕሉ ብዝሰንዓ ጃልባ፣ ካብ ሆላንድ ተበጊሱ ናብ ብሪጣንያ ንምስጋር ዝሓለነ ኤርትራዊ ሓታቲ ዑቕባ፣ ናብ ኢጣልያ ክስጎግ ምዃኑ ምዕከን ዜና ቴሌግራፍ ሓቢሩ።

እቲ ስሙ ዘይተጠቕሰ፣ ወዲ 26 ዓመት ኤርትራዊ፣ ካብ ፕላስቲክ ዝተሰርሐ ናይ ፍዮሪ ዓታሩ፣ ንኣሽቱ ጀሪካናትን ስፑኞታትን ጌሩ ብዝሰንዓ ጃልባ፣ ‘ዩምደን’ ካብ ዝተባህለ ገማግም ባሕሪ ሆላንድ ድሕሪ ምብጋሱ’ዩ፣ ብሰንበት 2 ሰነ ብኣባላት ድሕነት ሓደጋ ባሕሪ ተታሒዙ።

ዕላምኡ ድማ ናብ ብሪጣንያ ብምእታው ዑቕባ ንምሕታት’ዩ ኔሩ።

እቲ ኤርትራዊ፣ ክሳብ’ቲ ዝቐረበ ገማግም ባሕሪ ንምብጻሕ እንተወሓደ ኣስታት 100 ኪሎሜተር ንውሓትን ቀዝሒ ዝዓብለሎ ኩነታት ኣየርን ክብድህ’ዩ ተበጊሱ ኔሩ።

ኣብ ሰሜናዊ ባሕሪ፣ እናጀለበ ድሕሪ ምትሓዙ ፣ ኣብዚ እዋን’ዚ ኣብ ትሕቲ ቁጽጽር ፖሊስ ሆላንድ ይርከብ።

ኣብ ኢጣልያ ናይ ዝኣተወሉ ኣሰር ኣጻብዕቲ ስለዝተረኽበ፣ ብመሰረት ሕጊ ዳብሊን፣ መንግስቲ ሆልናድ ናብ ኢጣልያ ክምለሶ ምዃኑ እቲ ጸብጻብ ዝጠቅስ።

====================

ርእይቶ

WORDPRESS: 0