ኢትዮጵያ እተቑሞ ሓይሊ ባሕሪ፣ ኣብ ጅቡቲ ትድኩኖ ከምዘላ ተገሊጹ

Radio Erena: 03 December 2019

ኢትዮጵያ፣ ብሓገዝ ፈረንሳ እተቝሞ ዘላ ሓይሊ ባሕሪ ኣብ ጅቡቲ ክድኮን ምዃኑ ዘ ካፒታል ዝተባህለት ጋዜጣ እታ ሃገር ሓቢራ።

ብመሰረት እታ ጋዜጣ ዘቕረበቶ ሓበሬታ፣ ሓይሊ ባሕሪ ኢትዮጵያ፣ መደበሩ ኣብ ባህርዳር ኮይኑ፣ መናሃርያኡ ጅቡቲ’ዩ።

ፈረንሳ፣ ኣባላት ሓይሊ ባሕሪ ኢትዮጵያ ኣብ ጅቡቲ ምስልጣን ጀሚራ ምህላዋ’ውን እቲ ምንጪ ይጠቕስ።

ፕረዚደንት እስማዒል ዑመር ገለ፣ ምስ ሓንቲ ካብ ዓበይቲ መጽሔታት ፈረንሳ- ዤን ኣፍሪክ ኣብ ዘካየዶ ቃለ መጠይቕ፣ ሓይሊ ባሕሪ ኢትዮጵያ ኣብ ወደብ ባጽዕ ከምዝድኮን ጠቒሱ ምንባሩ ይዝከር።

ኢትዮጵያ፣ ነቲ ምስ ናጽነት ኤርትራ ዝተበታተነ ሓይሊ ባሕራ ዳግም ንምቛሙ ትሰርሕ እኳ እንተላ፣ መደበሩ ብምስጢር ሒዛቶ ትርከብ።

================