‘ኤርትራዊ ስደተኛ’ ኣብ ፈረንሳ፣ ንነፍሰጾር በዓልቲ ቤቱ ካብ ሓሙሻይ ደርቢ ኣጽዲፉ ቀቲሉዋ

Radio Erena: 20 March 2023

ኣብ ምዕራባዊ ፈረንሳ፣ ኣብ እትርከብ ከተማ ‘ፕዋትየኽ’ (Poitiers)፣ ንነፍሰጾር በዓልቲ ቤቱ ካብ ሓምሻይ ደርቢ ኣጽዲፉ ዝቐተላ ‘ኤርትራዊ’ ኣብ ቀይዲ ከምዝኣተወ ፖሊስ ኣፍሊጡ።

እቲ ኣብ ኢትዮጵያ ዝተወልደ ኤርትራዊ ምዃኑ ዝተጠቕሰ ስደተኛ፣ ናይ ሓሙሽተ ኣዋርሕ ነፍሰጾር ንዝነበረት ኤርትራዊት በዓልቲቤቱ፣ ድሕሪ ሓያል ጭቅጭቕ ብባልኮኒ ደፊኡ ከምዘጽደፋ ከምዝተኣመነ’ዩ ጸብጻብ ፖሊስ ዘመልክት።

በዓልቲ ቤቱ፣ ምስ ካልኦት ትዘውር ኣላ ዝብል ጥርጣረ ዝፈጠረሉ ሓያሎ ቅንኢ፣ ናብ ቆይቕን ጭቕጭቕን ስለዘምርሖ፣ ስምዒቱ ክቖጻጸር ብዘይምኽኣሉ፣ ብ6 መጋቢት፣ ካብ ዝነብርሉ ህንጻ ደፊኡ ከምዘጽደፋ፣ ንዝሃቦ ቃለ ብምጥቃስ፣ ኣኽባር ሕጊ ከተማ ፕዋትየኽ ኣረዲኡ።

ንሳ፣ ካብ ሓሙሻይ ደርቢ ጸዲፋ ናብ መሬት ድሕሪ ምዕላባ፣ ብኡ ንብኡ ከምዝሞተት ኣብቲ ቦታ ዝተረኽቡ ናይ ህጹጽ ረዲኤት ሓካይም ሓቢሮም።

ካብቲ ዕለት እቲ ኣትሒዙ ኣብ ቀይዲ ዝርከብ፣ ስሙ ዘይተጠቕሰ ኤርትራዊ ስደተኛ ኣብ ፈረንሳ፣ ብቕትለት ኣደን ኣብ ማህጸን ዝነበረ ዕሸልን ተኽሲሱ፣ ጉዳዩ ብቤት ፍርዲ ይርአ ኣሎ።

===================