ዶብ ሶማልን ኢትዮጵያን: ብውሕዱ ሽዱሽተ ኢትዮጵያውያን ብዕጡቓት ተቐቲሎም

Radio Erena: Thursday, 08 February 2024

ንሶማል፣ ኢትዮጵያን ኬንያን ኣብ ዘዋስን ከባቢታት ከተማ በለድ ሃዎ፣ ዕጡቓት ብዝፈጸምዎ መጥቃዕቲ ብውሕዱ ሓሙሽተ ደቂንስትዮን ሓድ ሰብኣይን፣ ሽዱሽተ ኢትዮጵያውያን ከምዝተቐትሉ መርበባት ዜና ሓቢረን።

እቲ ናብ 05 ለካቲት ኣብ ዘውግሐ ለይቲ፣ ኣብ ደቡባዊ ምዕራብ ሶማል ኣብ እትርከብ ከተማ ዝተፈጸመ መጥቃዕቲ፣ ንዜጋታት ኢትዮጵያ ዒላማ ዝገበረ ምንባሩ‘ዩ ተሓቢሩ።

ኣብቲ መጥቃዕቲ፣ ሓንቲ ሶማላዊት‘ውን ብላኼማ ከምዝትቐትለት ኣመሓደርቲ ናይቲ ከባቢ ጠቒሶም።

ካልኦት ሽዱሽተ ኢትዮጵያውያን‘ውን ብፎኵሲን ከቢድን ቆሲሎም ኣለዉ።

ናይቲ ንዜጋታት ኢትዮጵያ ዒላማ ዝገበር መጥቃዕቲ፣ ብወግዒ ሓላፍነት ዝወሰደሉ ኣካል እኳ እንተዘየለ፣ ዕጡቓት ኣልሸባብ ከምዝፈጸምዎ‘ዩ እቶም ኣመሓደርቲ ዝወቕሱ።

መንግስቲ ኢትዮጵያን ርእሰ ምምሕዳር ሶማሊላንድን፣ ኣብ ጉዳይ ዋንነት ባሕሪ ዘተኮረ ናይ መረዳድኢ ስምምዕ ድሕሪ ምኽታሞም፣ ኣብ ሶማላውያን ቁጠዐ ኣለዓዒሉ ከምዝርከብ ይፍለጥ።

ስእሊ፦ ካብ ኣርካይቭስ ኢንተርነት

===================