ዶብ ሱዳንን ደቡብ ሱዳንን፣ ዓቀብቲ ሰላም ዝርከብዎም ብውሕዱ 54 ሰባት ተቐቲሎም

Radio Erena: Thursday, 01 February 2024

ንሱዳንን ደቡብ ሱዳንን ኣብ ዘዋስን ዞባ ኣብየይ ኣብ ዝተኻየደ መጥቃዕቲ፣ ዓቀብቲ ሰላም ዝርከብዎም ብውሕዱ 54 ሰባት ከምዝተቐትሉ መርበባት ዜና ገሊጸን።

ኣብ ዝሓለፍ ሰሙን ዝተኻየደ መጥቃዕቲ፣ ልዕሊ 60 ሰባት‘ውን ብከቢድ ቆሲሎም ከምዘለዉ‘ዩ ተመልኪቱ።

ብውሕዱ ክልተ ኣባላቱ ከምዝተቐትልዎን ኣርባዕተ ድማ ከምዝቖሰሉን ኣብቲ ዞባ ተዋፊሩ ዝርከብ ዓቃብ ሰላም ሰራዊት ሕቡራት ሃገራት ኣረጋጊጹ።

እቲ መጥቃዕቲ፣ ጠበናጁ፣ ጎዞሞን ካልእ ነገራትን ዝዓጠቑ መንእሰያትን ዕጡቓት ተቓወምቲ ሚሊሻታትን ዝፈጸምዎ ምዃኑ‘ዩ ተጠቒሱ።

እቲ መበገሲኡ ንጹር ዘይኮነ መጥቃዕቲ፣ ብዝያዳ ንሲቪልን ዓቃብ ሰላም ሰራዊት ሕቡራት ሃገራትን ዘነጻጸረ ምንባሩ ሰበ ስልጣን እቲ ዞባ ሓቢሮም።

ብነዳዲ ሃብታም ዝኾነ ዞባ ኣብየይ፣ ብዝይካ‘ቲ ምስ መንግስታት ሱዳንን ደቡብ ሱዳንን ዘለዎ ምስሕሓብ፣ ናይ ቀቢላን ካልእ ግጭታትን‘ውን ብብዝሒ ከምዝካየደሉ በብእዋኑ ይግለጽ።

=================