ሑቲ፣ ኣብ ስዑዲ ዓረብን ሕቡራት ኢማራትን ናይ ሚሳይል መጥቃዕቲ ኣካይዱ

Radio Erena: 24 January 2022

ሑቲ፣ ኣብ ስዑዲ ዓረብን ሕቡራት ኢማራትን ዒላማ ንዝገበሮ ከባቢታት ናይ ሚሳይል መጥቃዕቲ ኣካይዱ።

ኣብቲ ሎሚ ሰኑይ 24 ጥሪ፣ ኣብ ስዑዲ ዓረብ፣ ኣብ ኢንዱስትራዊ ዞባ ዳሃህራንን ጂዛንን ዘካየዶ ተደጋጋሚ ደብዳብ፣ ኣብ ንብረት ዕንወት ክወርድ እንከሎ ክልተ ሰባት ድማ ከምዝቆሰሉ ኣገልግሎት ዜና ፈረንሳ ኣረጋጊጹ።

ብተመሳሳሊ ሒቲ፣ ናብ ኣቡ ዳቢ’ውን ክልተሚሳይላት ወንጪፉ።

ይኹን’ምበር እቲ ሚሳይላት ዒላምኡ ከይሃረመ፣ ኣብ ክሊ ኣየር እንከሎ ክመክን ከምዝኸኣለ፣ ሕቡራት ኢማራት ዓረብ ገሊጻ።

ኢማራት ብኡ ንብኡ ብዝወሰደቶ ግብረ መልሲ፣ ኣብ ሰሜናዊ የመን ኣብ ዝርከብ፣ ኣልጃውፍ ዝተባህለ ከባቢ፣ ተጻዊዱ ዝነበረ መተኮሲ ሚሳይለት፣ ኤፍ 16 ብዝዓይነትን ነፈርቲ ከምዘዕነወቶ ኣፍሊጣ።

ኣብ ዝሓለፈ ሰሙን፣ ኣብ ኣቡ ዳቢ ናይ ድሮን መጥቃዕቲ ዘካየደ ሑቲ፣ ኣብ ስዑዲ ዓረብን ሕቡራት ኢማራትን ዝርከብ ዒላማታት ደብዳቡ ክቕጽል ምዃኑ ከጠንቅቕ ጸኒሑ’ዩ።

ስዑዲ ዓረብን ሕቡራት ኢማራትን ብወገነን፣ ኣብ ዘካይድኦ ዘለዋ ናይ ግብረ መልሲ ደብዳብ ነፈርቲ፣ ኣብ ቀይሕ ባሕሪ ኣብ እትርከብ ወደብ ሖደይዳን ከተማ ሰንዓን 10ታት ሰባት ከምዝቐተላ ይግለጽ።

===================