ዩኔስኮ፣ ኣብ መንጎ ጥሪ 2022 ክሳብ ሓምለ 2023፣ 69 ጋዜጠኛታት ተቐቲሎም

Radio Erena: Friday, 10 November 2023

ጸብጻብ ዩኔስኮ ከምዘመልክቶ፡ ኣብ መንጎ ጥሪ 2022 ክሳብ ሓምለ 2023 ካብ ዓሰርተ ሃገራት 69 ጋዜጠኛታት ከምዝተቐትሉ ይሕብር።

ብደረጃ ዓለም፡ እቶም ዘይተፈትሑ ጉዳያት ቅትለት ጋዜጠኛታት ካብ ነፍሲ ወከፍ 10 ፍጻመታት ኣስታት 9 ዝሕዙ ኮይኖም፡ ብፍላይ ኣብ 2 ሕዳር መበል 10 ዓመት ዝኽሪ ኣህጉራዊ መዓልቲ ንገበናት ኣንጻር ጋዜጠኛታት ዝፍጸም መቕጻዕቲ ንምውጋድ ኣብ ዝተኸብረሉ እዋን፡ ኣዝዩ ዓቢ ቁጽሪ እዩ ተባሂሉ።

ብመሰረት ጸብጻብ ዋና ዳይረክተር ድሕነት ጋዜጠኛታት UNESCO፡ ላቲን ኣመሪካን ካሪብያንን ዝበዝሐ ቅትለት ጋዜጠኛታት ዘለወን ሃገራት ኮይነን ይቕጽላ ኣለዋ።

ኣብ መንጎ ጥሪ 2022 ክሳብ ሓምለ 2023 ኣብቲ ዞባ ካብ ዓሰርተ ሃገራት ዝመጹ 69 ጋዜጠኛታት ከምዝተቐትሉ ኣሃዛት ዩኔስኮ ይሕብሩ።

ዩኔስኮን መሻርኽቱን ህጹጽ ኣድላይነት ስጉምቲ ብምግንዛብ፡ ብዕለት 3 ሕዳር 2023 ኣብ ዋሽንግተን ዲሲ ተኣኪቦም ኣቓልቦን ደገፍን ማሕበረሰብ ዓለም ጸዊዖም።

እቲ ዘተ፣ ኣብ ስደት ጋዜጠኛታት ዘጋጥሞም ብድሆታት፡ ዝደልይዎ ደገፍን ኣብ ላቲን ኣመሪካን ካሪብያንን ዝካየድ ዘሎ ክልተ ተበግሶታት ዩኔስኮን ገሊጹ።

እዚ ብኣህጉራዊ ፕሮግራም ልምዓት ርክብ ዩኔስኮ (IPDC) ዝድገፍ ፕሮጀክት፣ ካብ ፈረንሳ፣ ሆላንድን ፖላንድን ብዝገበርዎ ኣበርክቶ ኣብ 2022 እዩ ጀሚሩ።

ኣብ ግጭትን ድሕሪ ግጭትን ንዝርከቡ ጋዜጠኛታት ውሑስ ቦታታት ዝድግፍ ኮይኑ፣ ብፍላይ ኣብ ተመዛበልትን ዲያስፖራ ጋዜጠኛታትን ኣቓልቦ ይገብር።

ኣብ ዩክሬን፣ ፓኪስታን (ንጋዜጠኛታት ኣፍጋኒስታን)ን ሱዳንን መጽለሊ፣ ናይ ስራሕ ቦታታትን ስራሕ ንምቕጻል ዘድልዩ ጸጋታትን ከምኡ’ውን ዕድላት ስልጠና፣ ከምኡ’ውን ሕጋውን ስነ-ኣእምሮኣውን ደገፍ ንምሃብ ፈተነ ይቕጽል ኣሎ።

================