ፕረዚደንት ሶማል፣ ኣብ ኢጣልያ ወግዓዊ ናይ ስራሕ ምብጻሕ ኣካይዱ

Radio Erena: 09 February 2023

ፕረዚደንት ሶማል፣ ሓሰን ሸኽ ማሕሙድ፣ ኣብ ኢጣልያ ወግዓዊ ናይ ስራሕ ምብጻሕ ኣካይዱ።

እቲ ፕረዚደንት፣ ብ08 ለካቲት ናብ ሮማ ኣብ ዝኣተወሉ፣ ምስ ፕረዚደንት ሰርጅዮ ማተሬላን ቀዳማይቲ ሚኒስተር፣ ጂዮርጂያ ሜሎኒን ብምርኻብ፣ ኣብ ጸጥታ፣ ልምዓትን ምግታእ ዋሕዚ ስደትኛታት ሶማልን ብምትኳር ከምዝተመያየጠ መርበባት ዜና ሶማል ሓቢረን።

ኣብ ዝሓለፈ ሰሙን፣ ብሚኒስተር ምክልኻል፣ ማተዮ ፐሬጎ ዝምራሕ ላዕለዋይ ልኡኽ ኢጣልያ፣ ናብ ሞቛድሹ ምብጻሕ ብምክያድ ምስ ፕረዚደንት እታ ሃገር ምዝታዩ፣ መግለጺ ቤት መንግስቲ ቪላ ሶማል ኣፍሊጡ።

ፕረዚደንት ሓሰን ናብ ኢጣልያ ዘምርሕ ዘሎ፣ ሳልስቲ ድሕሪ ዑደት ቀዳማይ ሚኒስተር ኢትዮጵያ፣ ኣብይ ኣሕመድ ናብታ ሃገር’ዩ።

ኣብ ሃገራት ኤውሮጳ ዑደት ዘካይድ ዘሎ ቀዳማይ ሚኒስተር ኣብይ፣ ኣብ ኢጣልያ ኣብ ዝጸንሓሉ’ውን ምስ መራሕቲ እታ ሃገር፣ ኣብ ተመሳሳሊ ዛዕባ ምዝታዩ ተሓቢሩ።

====================