ቢንያም ግርማይ፣ ኣብ Volta a la Comunitat Valenciana ቀዳማይ ተዓዊቱ

Radio Erena: 01 February 2023

ተቐዳዳማይ በልጅዩማዊት ዎርልድ ቱር ቲም Intermarché – Circus – Wanty፡ ኤርትራዊ ቢንያም ግርማይ፡ ሎሚ ሮቡዕ ባሕቲ ለካቲት፡ 189.4 ኪሎ ሜትር ብዝርሕቐቱ ውድድር ኣብ ዝተኸፍተ፡ መበል 74 ቅድድም Volta a la Comunitat Valenciana፡ ቀዳማይ ብምውጻእ ድሙቕ ዓወት ሰኒዱ።

ቢንያም ነዚ ኣብ ስጳኛ ዝተኻየደ ውድድር ዝተዓወተሉ፡ ኣብ መወዳእታ ተኣኪባ ንዝመጸት ዓባይ ጉጅለ ብሽዃ ብምስዓር እዩ። ነዚ ውጽኢት ተኸቲሉ ወዲ 22 ዓመት ቢንያም፡ ንብጫ ማልያ ውህሉል ግዜ፡ ንቀጠልያ ማልያ ሽኳን ንጻዕዳ ማልያ ብሉጽ መንእሰይን፡ ጠርኒፉ ኣብ ኢዱ ኣእትይወን።

ኣብ’ዚ ቅድድም ዝተሳተፈ ካልእ ኤርትራዊ፡ ተቐዳዳማይ ኣሜሪካዊት ዎርልድ ቱር ቲም Trek – Segafredo ኣማኑኤል ገብረእግዚኣብሄር ብወገኑ መበል 29 ተርታ ተሰሪዑ።

ኣብ ዝሓለፈ ሰሙን ኣብ ዘካየዶ ውድድራት፡ ሓንሳብ ሳልሳይ ሓንሳብ ድማ ካልኣይ ደረጃ ዝሓዘ ቢንያም፡ ኣብ ውሽጢ ሓደ ሰሙን፡ ሎሚ ንሳልሳይ ግዚኡ እዩ፡ ኣብ ፖድየም ዝድይብ ኣሎ።

ሓሙሽተ መድረኻት ዘለዎ Volta a la Comunitat Valenciana፡ ጽባሕ ሓሙስ`ውን፡ ካብ ኖቬልዳ ናብ ኣልቶ ዴ ፒኖስ 178.2 ኪሎ ሜትር ክጓዓዝ እዩ።

===========================