ሶማል፣ ኣብ መንጎ ክልተ ቀቢላታት ብዝተኻየደ ግጭት ብውሕዱ 55 ሰባት ከምዝተቐትሉ ተገሊጹ

RADIO ERENA – Monday, 10 June 2024

ኣብ ሶማል፣ ኣብ ቀዳመ–ሰንበት፣ ኣብ መንጎ ክልተ ቀቢላታት ኣብ ዝተኻየደ ግጭት፣ ብውሕዱ 55 ሰባት ክቕተሉ እንከለዉ፣ ልዕሊ 155 ድማ ከምዝቖሰሉ፣ ንሰበ ስልጣን ጥዕና ብምጥቃስ ሮይተርስ ሓቢሩ።

እቲ ኣብ መንጎ ቀቢላታት ዲርን ማሪሃን ዝተኻየደ ግጭት፣ ብዋንነት መሬትን ማይን ብዝተበገሰ ምስሕሓብ ከምዝተጎሃሃረ፣ ነበርቲ ‘ቲ ግጭት ዝተወልዓለን ዓድታት ኣቡድዋቕን ሔራልን ከምዝሓበርዎ‘ዩ እቲ ኣገልግሎት ዜና ጠቒሱ።

ክልቲኦም ቀቢላታት፣ ኣብ ጎኒ ሰራዊት መንግስቲ ምስ ዝተሰለፈ ሚሊሻ ብምዃን፣ ኣልሸባብ ካብ ዞማ ጋልምዱግ ንምጽራግ ኣብ ዝተኻየደ ወትሃደራዊ ወፍሪ ከምዝተጸንበሩ ‘ዩ ዝግለጽ።

ኣብ ሶማል፣ ብዘይካ‘ቲ ኣልሸባብ ፈጢርዎ ዘሎ ጸጥታዊ ስግኣት፣ ነዚ ዝሓለፈ ልዕሊ 33 ዓመታት ምሉእ ብምሉእ ክዓርፍ ዘይክኣለ ቀቢላዊ ግጭታት‘ውን ካልእ ዘቤታዊ ብድሆ‘ዩ።

ሰራዊት መንግስቲ፣ ነቲ ንክልተ መዓልታት ዝቐጸለ ግጭት ድሒሩ ከህድኦ እኳ እንተኸኣለ፣ ወጥርን ምትፍናንን ግና ዛጊት ኣይዘሓለን።

ስእሊ፦ ካብ ኣርካይቭስ ኢንተርነት

========================