ኣብ ኤርትራ ክስልጥኑ ዝጸንሑ ሚሊሻ ምብራቕ ሱዳን፣ ኣብ ጎኒ ሰራዊት ሱዳን ንምስላፍ ናብ ከሰላ ተዋፊሮም

RADIO ERENA – Wednesday, 30 October 2024

ኣብ ኤርትራ ክስልጥኑ ዝጸንሑ ሚሊሻ ምብራቕ ሱዳን፣ ኣብ ጎኒ ሰራዊት መንግስቲ ሱዳን ንምስላፍ፣ ናብ ዞባ ከሰላ ከምዝተዋፈሩ ኣፍሊጦም።

እቶም ብጀነራል ኣል ኣሚን ዳውድ ማሕሙድ ዝምርሑ ሚሊሻ፣ ብ‘ኦርጣ‘ ዝፍለጡ ኮይኖም፣ ኣብ ሱዳን፣ ምብራቓዊ ቦጦሎኒ ብምቛም፣ ንሰራዊት መንግስቲ ንምድጋፍ ከምዝተዋፈሩ፣ ንመግለጺ እቲ ሓይሊ ብምጥቃስ፣ ማዕከናት ዜና ሓቢረን።

ምብራቓዊ ቦጦሎኒ፣ ሓደ ካብቶም ኣብ ኤርትራ ክስልጥኑ ዝጸንሑ ሚሊሻታት ምብራቕ ሱዳን ምዃኑ ‘ዩ ዝግለጽ።

እቲ ሓይሊ ሚሊሻ፣ ኣብ ምብራቕ ሱዳን፣ ኣብ ጎኒ ሰራዊት መንግስቲ ተሰሊፉ፣ ብጀነራል ሓምዳን ዳጋሎ ዝምራሕ ‘ዳዕም ሰሪዕ‘ ወይ ፈጣን ሓይልታት ካብ ዘካይዶ መጥቃዕታት ንዞባኡ ክከላኸል ምዃኑ ‘ዩ ጠቒሱ።

እዚ ከምዚ‘ሉ እንከሎ፣ ሰራዊት ሱዳን፣ ዓንዲ ሕቆ ሱዳን ብምዃኑ፣ ድጋፉን ዓወቱን ኣገዳሲ‘ዩ ክብል ፕረዚደንት ኢሳይያስ ኣፍወርቂ ከምዝገለጸ፣ ናብ ኤርትራ ዝበጽሑ ጉጅለ ጋዜጠኛታት ሱዳን፣ ኣብ መርበብ ሓበሬታ ኣልጀዚራ ኣብ ዘስፈርዎ ዓንቐጽ ሓቢሮም።

እቶም ጋዜጠኛታት፣ ብ28 ጥቅምቲ ናብ ኤርትራ ኣብ ዝበጽሕሉ፣ እቲ ፕረዚደንት ኣብ ዝሃቦም ሓበሬታ፣ ኣዛዚ ዳዕም ሰሪዕ፣ ጀነራል ሓምዳን ዳጋሎ፣ ቅድሚ ኵናት ናብ ኣስመራ ኣብ ዝበጽሓሉ፣ ብዛዕብ ዘካየድዎ ምይይጥ ከምዘውክኣሎ‘ዮም ጠቒሶም።

ኤርትራ፣ ንሱዳናውያን ንምሽምጋል ተበግሶ ዘይወሰደትሉ ምኽንያት፣ ጉዳይ ሱዳን፣ ብዙሓት ዝጓየይሉ ዘለዉ ናይ ዕዳጋ ምርኢት ወይ ባዛር ኮይኑ ስለዘሎን ነቲ ዞባ ናብ ሓደገኛ ኣንፈት ከምርሖ ስለዝኽእልን ምዃኑ ኣሚቱ።

ሱዳን፣ ብሰንኪ ምትእታትው ናይ ግዳም ሓይልታት ናብ ታኼላ ከይትሽመም ዘተሓሳሰበ እቲ ፕረዚደንት፣ ብፍላይ ጸላእቲ ሱዳን ዝኾና ጎረባብቲ ሃገራት፣ ናይ ገዛእ ርእሰን ውሳኔታት ስለዘይብለን፣ ንሱዳን ግዳይ ዞባዊ ኣጀንዳ ከይገብርኣ ኣዘኻኺሩ።

ሱዳን፣ ማእከል ርግኣት እቲ ዞባ ምዃና ፕረዚደንት ኢሳይያስ ምጥቃሱ‘ውን እቶም ጉጅለ ጋዜጠኛታት፣ ኣብቲ ኣብ ኣልጀዚራ ዘቕረብዎ ጽሑፍ ሓቢሮም።

ኣብ ርእሲ‘ዚ፣ ሱዳናውያን ጉዳያቶም ባዕላቶም ክፈትሑ ዓቕሚ ኣለዎም ዝበለ እቲ ፕረዚደንት፣ ናይ ግዳም ምትእትታው ከምዘየድልዮም ኣስሚርሉ።

=================