ኢትዮጵያ፣ ኣብ ክልል ጋምቤላ ኣብ ዝተጎሃሃረ ግጭት፣ ሓይልታት ጸጥታ ዝርከብዎም ሓያሎ ሰባት ከምዝተቐትሉ ተገሊጹ

RADIO ERENA – Thursday, 16 May 2024

ኣብ ኢትዮጵያ፣ ክልል ጋምቤላ፣ ኣብዚ ዝሓለፈ ሳልስቲ ኣብ ዝተጎሃሃሀር ግጭት፣ ሓይልታት ጸጥታ ዝርከብዎም ብውሕዱ ትሽዓተ ሰባት ከምዝተቐትሉ መርበባት ዜና ገሊጸን።

እቲ ኤታንግ ኣብ ዝተባህለ ዞባ ዝተወልዐ ግጭት፣ ዕጡቓት ብዝኸፈትዎ ቶዅሲ ዝተበገሰ ምዃኑ ‘ዩ ኮሚሽነር ፖሊስ እቲ ዞባ፣ ኡሞድ ኡሞድ ወቒሱ።

ሓይልታት ጸጥታ መንግስቲ፣ ነቶም ዕጡቓት ኣጽዋሮም ከረክብዎ ኣብ ዝገድድሎም ዝነበሩ ቶዅሲ ከምዝኸፈቱ ዝሓበረ እቲ ኮሚሽነር ካብቶም ዝተቐትሉ እቶም ሰለስተ ካብ ሓይልታት ጸጥታ እቶም ካልኦት ድማ ሰለማውያን ሰባት ምዃኖም ኣመልኪቱ።

ራድዮ ዶቸቬለ ንነበርቲ እቲ ከባቢ ብምጥቃስ ብዘቕረብቶ ዜና መሰረት፣ ብከቢድን ፎኵሲን ዝቖሰሉ 17ሰባት ኣለዉ።

ኣብቲ ዞባ፣ ህዝባዊ መጓዓዝያ ተቛሪጹ ኣሎ።

ምስ ደቡብ ሱዳን ዝዳወብ ክልል ጋምቤላ ናይ ኢትዮጵያ፣ ኑዌርን ኣኝዋክን ዝተባህሉ ብሄራት ብብዝሒ ዝነብርዎ ኮይኑ፣ ተደጋጋሚ እዋን ግጭታት ክኽሰተሉ ምጽንሑ ይፍለጥ።

======================