ኢትዮጵያ፣ በብእዋኑ ኣብ ዝነቱግ ዘሎ ናይ ብሄር ግጭታት፣ ኣብ ክልል ደቡብ፣ ብውሕዱ 10 ሰባት ተቐቲሎም

Radio Erena: 31 March 2021

ኣብ ኢትዮጵያ፣ ከም መቐጸልታ ናይቲ በብእዋኑ ዝነቱግ ዘሎ ናይ ብሄር ግጭታት፣ ኣብ ክልል ደቡብ፣ ዞባ ቤንች ማጂ፣ ጉራፈርዳ ኣብ ዝተባህለ ከባቢ፣ ብውሕዱ 10 ሰባት ከምዝተቐትሉ፣ ራድዮ ጀርመን ሓቢራ።

እታ ራድዮ፣ ንነበርቲ እቲ ከባቢ ብምጥቃስ ኣብ ብዘቕረበቶ ዜና መሰረት፣ በቲ ኣብ ዝሓለፈ ሰሙን ዝተኻየደ መጥቃዕቲ ኣባላት ፖሊስን ሚሊሻን እቲ ከባቢ’ውን ግዳያት ኮይኖም’ዮም።

ቤት ጽሕፈት ጸጥታ ክልል ደቡብ ብዝሃቦ ሓበሬታ መሰረት ድማ፣ ቁጽሪ በቲ ግጭት ናይ ዝሞቱ ሰባት ሸውዓተ ጥራይ ምዃኑ ብምጥቃስ፣ ግጭት ዝተጎሃሃረለን ገጠራት፣ ጌልማ፣ ጌሊቲን ሙልሙልን ዝተባህላ ምዃነን ኣረጋጊጹ።

ወትሃደራዊ ክዳን ዝለበሱ፣ ዛጊት መንነቶም ዘይተፈልጡ ዕጡቓት፣ ነቲ መጥቃዕቲ ከምዝፈጸውዎ’ዩ ተመልኪቱ።

ኣብ ኢትዮጵያ፣ ኣብ ኩለን ክልላት ጸጸኒሑ ዝነቱግ ዘሎ ናይ ብሄር ግጭታት፣ ነታ ድሕሪ ክልተ ኣዋርሕ ምርጫ ከተካይድ ኣብ ትጽቢት ዘላ ሃገር፣ ብዝበኣሰ ክዓርግ ከምዝኽእል ሓያሎ ወገናት ስግኣቶም ይገልጹ።

============================