ቱርኪ፣ ኣብ መንጎ ኢትዮጵያን ሶማልን ብጉዳይ ዋንነት ኣፍደገ ባሕሪ ንዝተፈጥረ ምስሕሓብ ክትሽምግል’ያ

RADIO ERENA – Monday, 02 July 2024

ቱርኪ፣ ነቲ ኣብ መንጎ ኢትዮጵያን ሶማልን፣ ብጉዳይ ዋንነት ኣፍደገ ባሕሪ ዝተፈጥረ ምስሕሓብ ንምሽምጋል ተበግሶ ከምዝወሰደት ተሓቢሩ።

ማዕከን ዜና ኣል ዓረብያ፣ ምስቲ ጉዳይ ቅርበት ካብ ዘለዎም ኣርባዕተ ሰበ ስልጣን ረኺብዎ ብምባል ኣብ ዝዘርግሓቶ ሓበሬታ፣ እቲ ናይ ምሽምጋል መስርሕ ድሮ ተጀሚሩ ከምዘሎን እንተኾነ ዘተባብዕ ተስፋ ከምዘየረኣየን ጠቒሳ።

ሶማል፣ ናብ ሽምግልና ክትቐርብ እንተኾይና፣ ኢትዮጵያ ነቲ ምስ ርእሰ ምምሕዳር ሶማሊላንድ ዝኸተመቶ፡ ንኣፍደገ ባሕሪ ዝምልከት ናይ መዘኻኸሪ ሰነድ ብወግዒ ክትስርዞ‘ያ ትሓትት።

ኢትዮጵያ፣ ምስ ሶማሊላንድ ኣብ ዝኸተመቶ ናይ መረዳድኢ ሰነድ፣ 20 ኪሎሜተር ገማግም ባሕሪ ብናይ ነዊሕ ዓመታት ናይ ክራይ ውዕል ክትውን፡ ኣምሳያኡ ድማ ነታ ሉኣላዊት ኣካል ሶማል ዝኾነት ርእሰ ምምሕዳር ከም ሃገር ኣፍልጦ ክትህባን ዝብል‘ዩ።

መንግስቲ ሶማል፣ ነቲ ኢትዮጵያ ዝኸተመቶ ሰነድ፣ ሉኣላውነት ሶማል ዝግህስን ዘይሕጋውን‘ዩ ብምባል ክቓወሞ እንከሎ፣ ኣምባሳደሩ ካብ ኣዲስ ኣበባ ምስሓብን ንኣምባሳደር ኢትዮጵያ ካብ ሃገሩ ምስጓግን ዝኣመሰለ ስጉምታት‘ዩ ወሲዱ።

ኣብ ርእሲ‘ዚ፣ ኣብታ ሃገር ዝርከቡ፣ ኣብ ትሕቲ ዓቃብ ሰላም ሰራዊት ሕብረት ኣፍሪቃ ዝተሓቖፉ ወትሃደራት ኢትዮጵያ ካብ ሃገሩ ክወጽኡ ጸዊዑ ኣሎ።

ሰራዊት ኢትዮጵያ፣ ዶባት ብምጥሓስ፣ ናብ ውሽጢ ሉኣላዊ ግዝኣት ሶማል ይኣቱ ዓኣሎ ክብል‘ውን መንግስቲ ሶማል ዝሓለፈ ሰሙን ናብ ባይቶ ጸጥታ ሕቡራት ሃገራት ጥርዓን ኣቕሪቡ‘ዩ።

ስእሊ፦ ካብ ኣርካይቭስ ኢንተርነት

==========================