ብሪጣንያ፣ ንዜጋታት ኤውሮጳ መእተዊ ቪዛ ክሓቱ ዘገድድ ሓድሽ ሕጊ ኣተኣታትያ

RADIO ERENA – Tuesday, 01 April 2025

ኣብ 2020 ካብ ሕብረት ኤውሮጳ ዝወጸት ብሪጣንያ፣ ዜጋታት ኤውሮጵ ናብ ሃገራ ብዘይጸገም ክኣትዉ‘ያ ክትፈቅድ ጸኒሓ።

ካብ ረቡዕ 02 ሚያዝያ ኣትሒዙ ግና፣ ዜጋታት ኤውሮጳ ናብ ብሪጣንያ ክገሹ እንተደልዮም፣ ብመንገዲ መርበብ ሓበሬታ ክፍሊ ውሽጣዊ ጉዳያት እታ ሃገር፣ ኤሌክትሮኒካዊ መእተዉ ፍቓድ ክሓቱ ክግደዱ‘ዮም።

እዚ ሓድሽ ሕጊ‘ዚ ንቆልዑን ህጻውንቲን‘ውን ዘጠቓልል‘ዩ።

ንሓደ ናይ ኤሊክትሮኒካዊ መእታዊ ቪዛ ንምሕታት ኣስታት 16 ፓውንድ ዓዲ እንግሊዝ ወይ ኣስታት 18 ኤውሮ ምኽፋል የድሊ።

እዚ መስርሕ እዚ ምስቲ ዜጋታት ኤውሮጳ ናብ ኣመሪካ ንምጋሽ ዝጥቐምሉ ተመሳሳሊ ኮይኑ፣ ሓተቲ ሓንሳእ ምስ ተፈቕዶም ንክልተ ዓመታት የገልግል።

ብሪጣንያ፣ ነዚ ናይ መእተዊ ቪዛ መስርሕ ክተተኣታቱ ዝተገደደትሉ ምኽንያት፣ ዋሕዚ ዘይሕጋዊ ስደት ንምግታእን ጸጥታ ዶባታ ንምውሓስን ምዃና‘ያ ኣመልኪታ።

እንተኾነ፣ ካብ ዝተፈላለያ ሃገራት ኤውሮጳ ግጥማት ኩዕሶ እግሪ ንምዕዛብ ናብ ብሪጣንያ ንዝግዕዙ ይኹኑ መዓርፎ ነፈርቲ እታ ሃገር ከምሰጋገሪ ተጠቒሞም ናብ ካልኦት ሃገራት ኤውሮጳ ንዝጎዓዙ ኣፍቀርቲ እዚ ዓውዲ ስፖርት ዕንቅፋት ክፈጥር ምዃኑ ተሰጊኡ ኣሎ።

ነዚ ንምፍታሕ ድማ መዓርፎ ሄዝሮን ማንቸስተርን ንዝጥቐሙ ናብ ካልእ ሃገራት ኤውሮጳ ንዝሰጋገሩ ገያሾ፣ በዚ ሓድሽ ሕጊ ኣይጽለዉን‘ዮም።

======================