ቀ/ሚ ኢትዮጵያ፣ ስልማት ናይ ሰላም ኖቤል ተዓዊቱ

Radio Erena: 11 October 2019

ቀዳማይ ሚኒስተር ኢትዮጵያ፣ ኣብይ ኣሕመድ (ዶ/ር)፣ ስልማት ናይ ሰላም ኖቤል 2019 ተዓዊቱ።

እቲ ቀዳማይ ሚኒስተር፣ ኣብ ሚያዝያ 2018 ኣብ ስልጣን ካብ ዝመጸሉ እዋን፣ ምስ ኤርትራ ናይ ሰላም ኣፍደገ ብምኽፋቱ፣ ኣብ ኢትዮጵያ ናይ ፖለቲካ እሱራት ብምፍትሑ፣ ኣብ ሱዳን መሰጋገሪ መንግስቲ ንምቛም ኣብ ዝተኻየደ ጻዕሪ ካልእን ኣበርክቶታት ኣብ ግምት ብምእታው ነቲ ስልማት ከምዝተዓወተሉ’ዩ ዝግለጽ።

እቲ ምስ ኤርትራ ናይ ሰላም ኣፍደገ ምኽፋቱ ብእወታ ዝረአ እኳ እንተኾነ፣ ሰራዊት ኢትዮጵያ፣ ካብታ መበገሲት ኵናት ዝኾነትን ካብ ክልቲኡ ወገን ልዕሊ 120 ሽሕ ሰባት ንምህላቅ ጠንቂ’ያ እትብሃልን ባድመ ዛጊት ኣይወጸን።

ምስ ቀዳማይ ሚኒስተር ንናይ ሰላም ኖቤል ካብ ዝተረቑሑ ልዕሊ 300 ጸለውቲ ሰባት፣ ንድሕነት ኣከባቢ እትጣበቕ፣ ጓል 16 ዓመት ሽወደናዊት መንእሰይ ግሬታ ቱንበርግ፣ ስደተኛታት ርሑው ኣፍደገ ክኽፈተሎም ዝጽውዑ ጳጳስ ፍራንሲስን፣ ኣብ መሳጊድ ድሕሪ ዝተፈጸመ መጥቃዕቲ፣ ጽኑዕ ምቁጽጻር ጠበናጁ ክግበር ትእዛዝ ዘመሓላለፈት ቀዳመይቲ ሚኒስርተር ኒውዝላንድ፣ ጃሲንዳ ኣርደርን ይርከብዎም።

ሎሚ ዓርቢ 11 ጥቅምቲ ኣብ ዝተነግረ ስም ዕውታት ድማ፣ ቀዳማይ ሚኒስተር ኢትዮጵያ ኣብይ ኣሕመድ ተዓዋቲ ናይ ሰላም ኖቤል 2019 ኮይኑ።

10 ታሕሳስ ኣብ ኖርወይ፣ ከተማ ኦሶሎ ኣብ ዝካየድ ጽምብል ድማ ብወግዒ ስልማቱ ክቕበል’ዩ።

==================