‘መቐመጫይ ተንኪፉኒ’ ብምባል፣ ንሓደ ኤርትራዊ ኣቦ ብካራ ዝቐተለት ኣመሪካዊት ኣብ ጀርመን፣ ‘ርእሰይ ንምክልኻል’የ ኢላ

RADIO ERENA – Wednesday, 04 December 2024

ጓል 20 ዓመት ኣመሪካዊት መንእሰይ ነበሪት ጀርመን፣ ከተማ ካይዘርስላውተርን፣ ኣብ መዓርፎ ባቡር፣ መቐመጫይ ተንኪፉኒ ብዝብል ክሲ፣ ንወዲ 64 ዓመት ኤርትራዊ ኣቦ ብካራ ብምቕታላ፣ ኣብ ፍርዲ ከምዝቐረበት ጋዜጣ ቢልድ፣ ኣብ ናይ 03 ታሕሳስ ሕታማ ኣስፊራ።

እታ መንእሰይ፣ ኣብ መወዳእታ ወርሒ ሰነ 2024፣ ነቶም ኤርትራዊ ኣቦ፣ ‘መቐመጫይ ተንኪፎሙኒ‘ ብምባል፣ ኣብ ሳንጣኣ ዝነበረ ተዓጻፊ ካራ ብምምዛዝ‘ያ ኣብ ከባቢ ኣፍ–ልቦም ደጋጊማ ወጊኣ ቀቲላቶም።

ትማሊ ሰሉስ ናብ ቤት ፍርዲ ኣብ ዝቐረበትሉ ድማ፣ ነብሰይ ክከላኸል ደኣ‘ምበር ክቐትሎም ኢለ ኣይሓሰብኩን ወይ ኣይተበገስኩን ብምባል ብመንገዲ ጠበቓኣ ሞጊታ።

ኣኽባር ሕጊ ብወገኑ፣ ካራ ካብ ሳንጣኣ ምስ ኣውጽአት እቶም ኣቦ ንድሕሪት እኳ እንተሰሓቡ፣ ደድሕሪኦም ስዒባ ደጋጊማ ኣብ ኣፍ–ልቦም ደጋጊማ ክትወግኦም ዘርኢ፣ ናይ ሓለዋ ካሜራታት ‘ቲ መዓርፎ ባቡር ዝቐረጾ ቪድዮ ከም መርትዖ ብምቕራብ፣ እቲ ዝወሰደቶ ስጉምቲ ካብ ርእሰ ምክልኻል ዝሓለፈ‘ዩ ክብል‘ዩ ተጣቢቑ።

እንተኾነ፣ ቀሪቡላ ዘሎ ክሲ ናይ ቅትለት ገበን ዘይኮነ፣ ዘይተሓስበ ሞት ዘስዓበ ጎነጽ‘ዩ ዝብል።

ንሳ፣ ነቶም ኣቦ ምስ ቀተለት፣ ተሰዊራ እኳ እንተነበረት፣ ድሒራ ኣብ ላንድስቱል ናብ ዝርከብ ፖሊስ ባዕላ ኢዳ ሂባ።

ዝቐረበላ ክሲ ‘ናይ ቅትለት ገበን‘ ኣይኮነን ዝብል ውሳኔ ስለዝተዋህቦ፣ ኣብዚ እዋን‘ዚ ካብ ማእሰርቲ ናጻ ተባሂላ፣ ናይ ቤት ፍርዲ ጉዳያ ካብ ደገ ክትከታተል ተፈቒዱላ ኣሎ።

=====================