Welcome to Radio Erena!
ቀዳማይ ሚኒስተር ሶማል ካቢነ እታ ሃገር ፈንጢሑ
Radio Erena: 20 January 2015
ቀዳማይ ሚኒስተር ሶማል ዑመር ዓብድራሺድ ዓሊ ሻርማረክ ንካቢነ ሚኒስተራት እታ ሃገር ፈንጢሑ።
እቲ ቀዳማይ ሚኒስተር ንካቢነ እታ ሃገር ክፍንጥሕ ዝተገደደሉ ምኽንያት፣ ኣቐዲሙ ዝረቑሖም 26 ሚኒስተራትን ምክትላቶም ዝርከብዎም 60 ሰበ ስልጣን ብፓርላማ እታ ሃገር ተቐባልነት ድሕሪ ምስኣኑ'ዩ።
እዚ ሓድሽ ዝተመዘዘ ቀዳማይ ሚኒስተር ዝረቑሖም ኣባላት ካቢነ ሚኒስተራት ብባይቶ እታ ሃገር ድሕሪ ምንጻጎም፣ ሓድሽ ካቢነ ሚኒስተራት ንምቛም ተወሳኺ ክልተ ሰሙን ግዜ ሓቲቱ ኣሎ።
ንቅትለት ኤርትራዊ ኻልድ ኢድሪስ ኣብ ጀርመን ዝኹነን ሰለማዊ ሰልፍታት ይካየድ ኣሎ
Radio Erena: 19 January 2015
ንቅትለት ኤርትራዊ ስደተኛ፣ ኻልድ ኢድሪስ ኣብ ጀርመን ዝኹነን ሰለማዊ ሰልፍታት ይካየድ ኣሎ።
ወዲ 20 ዓመት መንእሰይ ካልድ ኢድሪስ፣ ዝተቐትለሉ ምኽንያት ዓሌታዊ'ዩ ዝበሉ ኣብ ዝተፈላለየ ከተማታት ጀርመን ሰለማዊ ሰልፊ ዘካየዱ ኣምኢት ሰባት፣ ፖሊስ ጀርመን ንቐተልቲ እቲ ኤርትራዊ ክሕዝ ብዘይምኽኣሉ ኮኒኖም።
ቅትለት እቲ ናብ ጀርመን ካብ ዝኣቱ ዓመቱ ዘይመልአ ኤርትራዊ መንእሰያ፣ ምስቲ ኣብ ሃገራት ኤውሮጳ ኣንጻር ስደተኛታትን ጥሩፋት ኣመንቲ እስልምናን ተለዓዒሉ ዘሎ ስምዒታት ከምዝተሓሓዝ ዝተፈላለያ ማዕከናት ዜና ይጠቕሳ እኳ እንተለዋ፣ መንግስቲ ጀርመን ግና ነዚ ብወግዒ'ውን ክኣምነሉ ኣይከኣለን።
ብደረጃ ዓለም ልዕሊ 7 ሚልዮን ቅድሓት ዝሸጠት ናይ መሓመድ ካርቱን ዝሓዘት ጋዜጣ ሻርሊ ኤብዶ ኣብ ሓያሎ ሃገራት ዓለም ከኣ ተቓውሞታት ኣለዓዒላ
Radio Erena: 19 January 2015
መንግስቲ የመን፣ ምስ ኣልቓዒዳ ምትእስሳር ክህልዎም ዝኽእልክልተ ናይ ፈረንሳ ዜግነት ዘለዎም ጥርጡራት ኣብ ቀይዲ ከምዘእተወ ኣፍሊጡ።
እቶም ጥርጡራት ቅድሚ'ቲ ኣብ ፓሪስ ኣብ ልዕሊ ጋዜጠኛታት ዝተፈጸመ መጥቃዕቲ ከምዝተታሕዙ መንግስቲ እታ ሃገር እኳ እንተሓበረ፣ ምስቲ ናይ ፓሪስ መጥቃዕቲ ምትእስሳር ብዛዕባ ምንባሮም ግና ዝተፈልጠ ነገረ የለን።
ኣብ የመን ዝመደበሩ ኣልቓዒዳ ናይቲ ኣብ ፓሪስ ኣብ ልዕሊ ጋዜጠኛታት ዝተፈጸም ሽበራዊ መጥቃዕት ሓላፍነት ከምዝወሰደ ዝፍለጥ'ዩ።
ጅቡቲ ኣብ ምውሓስ ጸጥታ ባሕሪ ምስ መንግስቲ የመን ከምእትተሓባበር ገሊጻ
Radio Erena: 19 January 2015
ጅቡቲ ኣብ ጉዳይ ጸጥታ ቀይሕ ባሕሪ ምስ መንግስቲ የመን ከምእትተሓባበር ኣረጋጊጻ።
እታ ስትራቴጅያዊ ኣፍደገ ቀይሕ ባሕሪ እትውነን ጅቡቲ፣ ነዚ ዘረጋገጸ ኣብ ሰንዓ ዝርከብ ኣምባሳደራ መሓመድ ሕርሲ ምስ ቀዳማይ ሚኒስተር እታ ሃገር ካልድ በሓሕ ኣብ ዝተዘራረበሉ እዋን'ዩ።
ኣብ ቀይሕ ባሕሪ እትርከብ ወደባዊት ከተማ ሖዴዳን፣ ዝቑር ሓኒሽ ዝርከቦ ስትራቴጅያዊ ደሴታትን ኣብ ኢድ ተቓወምቲ ሑቲ ድሕሪ ምውድቁ ጸጥታ ቀይሕ ባሕሪ ኣብ ሓደጋ ክወድቕ ይኽእል'ዩ ዝብል ትንተናታት ክወሃቦ ጸኒሑ'ዩ።
መንግስቲ ኤርትራ ኣቐዲሙ፣ ንመንግስቲ የመን ዘለዎ ደገፍ ብምግላጽ ኣብ ምሕላው ጸጥታ ቀይሕ ባሕሪ ምትሕብባር ክገብር ምዃኑ ብመንገዲ ኣብታ ሃገር ዝርከብ ኣምባሳደሩ ምግላጹ ይዝከር።
ኣብ ኤርትራ ተኽእሎ ወትሃደራዊ ዕልዋ ኣሎ ዶ? ስርሒት ፎርቶ ኣብ ካልኣይ ዓመቱ
Radio Erena: 16 January 2015
ፖለቲካዊ ባህሊ ህዝቢ ኤርትራ ካብ ናይተን ካልኦት ሃገራት ኣፍሪቃ ፍልይ ዘብሎ ዝመስል ጠባያት ከምዘለዎ ሚኪኤላ ሮንግ ኣብታ I did't Do It for You እትብል መጽሓፋ ከተንጸባርቆ ፈቲና'ያ። ህዝቢ ኤርትራ ከም ካልኦት ህዝቢታት ኣፍሪቃ ኣብ ጎደናታት ብምውጻእ ናዕብን ዕግርግርን ብምክያድ ንመራሕቱ ናይ ምጭናቕ ልምዲ የብሉን እናተባህለ ብሓያሎ ፖለቲከኛታት ክግለጽ ጸኒሑ'ዩ። ዋላ'ውን ኣብቲ ዝኸበደ ናይ ምልኪን ጭቖናን እዋናት፣ ካብቶም ዘጨንቕዎ ሓይልታት ብምርሓቕ ሰላሕታዊ ስጉምቲ ምውሳድ'ዩ ዝቐሎ። ነዚ ሰላሕታዊ ስጉምቲ ክውድብ ዝኽእል ሓይሊ እንተተረኺቡ ከኣ ከም ናይ ብረታዊ ቃልሲ ንናጽነት ጎነጻዊ ሓይሊ ክፈጥር ይኽእል።