ዜና ኤርትራ

Radio Erena: 22 January 2019

ሃገራዊት ጋንታ ቅድድም ብሽክለታ ኤርትራ፣ ኣብቲ ብዕብየቱ ኣብ አፍሪቃ ኣብ ቀዳማይ ደረጃ ዝስራዕ ቅድድም ዙር ጋቦን ትወዳደር ኣላ።

ኣብቲ ካብ ትማሊ 21 ክሳብ 27 ጥሪ ዝካየድ ዘሎ፣ ቅድድም ብሽክለታ ትሮፒካል ኣሚሳ ቦንጎ፣ 10 ሃገራውያን ጋንታታት ኣፍሪቃ ዝርከብአን ሓያሎ ናይ ዓለምና ክለባት ይሳተፋ ኣለዋ።

ቱር ላ ትሮፒካል ኣሚሳ ቦንጎ፣ 2.1 ኣህጉራዊ መዐቀኒ ዘለዎ ቅድድም ብሽክለታ'ዩ።

Radio Erena: 21 January 2019

ንለውጢ ዝጠልብ፣ ስርሒት ፎርቶ ዝተኻየደሉ ሻድሻይ ዓመቱ ይዝከር ኣሎ።

እዚ ብስዉእ ኮለነል፣ ስዒድ ዓሊ ሕጃይ ዝተመርሐ ናይ 21 ጥሪ 2013 ስርሒት፣ ኣስታት ሓደ ሚእቲ ዝኾኑ ኣባላት ሰራዊትን ክልተ ታንክታቶም ብምሓዝ፣ ኣስመራ፣ ፎርቶ ናብ ዝርከብ ሚኒስትሪ ዜና ብምድያብ፣ ናይ ፖለቲካ እሱራት ክፍትሑን ቅዋም ክትግበርን ዝጠለበ።

Radio Erena: 20 January 2019

ኣባላት ሰራዊት ሓይልታት ምክልኻል ኤርትራ፣ ንዝመጽእ ኣርባዕተ ዓመታት ኣብ ማእቶት ክሳተፉ ምዃኖም ከምዝተሓበሮም ምንጭታት ሬድዮ ኤረና ሓቢሮም።

ኣብቲ ኣብ በበይኑ እዋን ዝካየድ ዘሎ ኣኼባታት ሰራዊት፣ ብዘይዝኾነ ይኹን ወሰኽ ክፍሊትን፣ ናይ መነባብሮ ፍታሕን፣ ንዝቕጽል ኣርባዕተ ዓመታት ኣገልግሎት ክቕጽል ምዃዩ’ዩ ዝግለጽ ዘሎ።

Radio Erena: 21 January 2019

መንግስቲ ኤርትራ፣ ስምምዕ ሰላም ምስ ኢትዮጵያ ጥራይ ዘይኮነል ኣብ ውሽጣዊ ኩነታት ሃገሩ'ውን ክልውጥን ከመሓይሽን ከምዝግባእ ኣባላት ፓርላማ ጀርመን ገሊጾም።

ፓርላማ ጀርመን፣ ቡንዱስታግ፣ ብ17 ጥሪ ኣብ ዘካየዶ ኣኼባ፣ ንስምምዕ ሰላም ኤርትራን ኢትዮጵያን ዘለዎ ደገፍ ድሕሪ ምግላጽ'ዩ፣ ኣብ ውሽጣዊ ኩነታት ኤርትራ ግና ዝተቐየረ ነገር ከምዘየለ ዘዘኻኸረ።

Radio Erena: 18 January 2019

 

ቤት ምኽሪ ወከልቲ ህዝቢ ኢትዮጵያ፣ ስደተኛታት ናይ ስራሕን ብናጻ ናይ ምንቅስቓስን መሰሎም ክሕሎ ዝድግፍ ኣዋጅ ብዓብላሊ ድምጺ ኣጽዲቑ።

እቲ ቤት ምኽሪ፣ ትማሊ ሓሙስ 17 ጥሪ፣ ኣብ ዘካየዶ መበል 19 ስሩዕ ኣኼባ፣ ኢትዮጵያ ኣቐዲማ ዝተቐበለቶን ዝኸተመትሉን ኣህጉራዊ ውዕላት ናብ ግብሪ ንምስግጋሩ፣ ዑቕባ ንዝተዋህቦም ስደተኛታት፣ ናይ ስራሕ ዕድላት ክኽፈተሎምን ናብ ዝደለይዎ ከባቢታት ኢትዮጵያ ክንቀሳቐሱን ዝፈቅድ'ዩ።