ዜና ኤርትራ

Radio Erena: 15 July, 2014

Alba Dessa

ሱዳናውያን ኣብ ኢትዮጵያ ናይ 2.4 ቢልዮን ዶላር ወፍሪ የካይዱ ምህላዎም ፕረዚደንት ማሕበር ወፍሪ ሱዳን ዓዋድ ኣልከሪም ስዒድ ሓቢሩ።

ንሱ፣ ንማዕከን ዜና ሱዳን ቪዥን ኣብ ዝሃቦ ሓበሬታ፣ ሱዳናውያን ኣብ ኢትዮጵያ ዘካይድዎ ዘለዉ ወፍሪ ድሕሪ’ቲ ናይ ቻይና ኣብ ካልኣይ ደረጃ ከምዝስራዕ’ውን ኣፍሊጡ።

Radio Erena: 14 July, 2014

eri in par

ላዕለዋይ ልኡኽ መንግስቲ ኤርትራ ምስ ሰበ ስልጣን መንግስቲ ፈረንሳ ንኽራከብ ዘቕረቦ ጻውዒት ተቐባልነት ከምዘይረኸበ ምንጭታት ሬድዮ ኤረና ኣረጋጊጾም።

ልኡኽ መንግስቲ ኤርትራ፣ ምስ ላዕለዎት ሰበ ስልጣን መንግስቲ ፈረንሳ ንምርኻብ ዝሓትት ዘሎ፣ ፈረንሳ ኣብ ልዕሊ’ቲ ኣብ ባይቶ ጸጥታ ውድብ ሕቡራት ሃገራት ዘሎ ቀዋሚ ኣባልነት፣ ኣብ ሕብረት ኤውሮጳ’ውን ገዚፍ ጽልዋ ስለእትውንን’ዩ።

ባይቶ ሰብኣዊ መሰላት ውድብ ሕቡራት ሃገራት፣ ኣብ ጄኔቫ ኣብ ዘካየዶ መበል 26 ኣኼባ’ውን መንግስቲ ኤርትራ ንዝፍጽሞ ዘሎ ምግሃስ ሰብኣዊ መሰላት እትምርምር ኮሚሽን ክትቐውም ኣብ ዝተወሰነሉ ግዜ፣ ተራ ፈረንሳ ዕዙዝ ምንባሩ’ዩ ተገሊጹ።

Radio Erena: 14 July, 2014

isma

መራሒ ተቓዋሚ ደቡብ ሱዳን ሬክ ማሻር ምስ ፕረዚደንት ጅቡቲ እስማዒል ዑመር ጉለ ተራኺቡ ተዘራሪቡ።

ኣብቲ ትማሊ ኣብ ጅቡቲ ዝተኻየደ ርክብ፣ ሬክ ማሻር፣ ብመንጎኝነት ኢጋድ ኣብ ኣዲስ ኣበባ ዝካየድ ዘሎ መስርሕ ሰላም ደቡብ ሱዳንን ብድሆታቱን ንፕረዚደንት እስማዒል ዑመር ጉለ ገሊጽሉ።

ምክትል ፕረዚደንት ደቡብ ሱዳን ነበር ሬክ ማሻር፣ ምስ ፕረዚደት ደቡብ ሱዳን ሳል ቫኪር ማያርዲት፣ ተኽእሎ ፈደራላዊ ምምሕዳርን ምቛም ግዝያዊ መንግስቲን ኣብ ዝብሉ ጉዳያት ስምምዕ ሰላም ኣብ ዝቕጽለሉ ዘሎ ግዜ'ዩ ሬክ ማሻር ናብ ጅቡቲ ወግዓዊ ዑደት ዘካየደ።

Radio Erena: 14 July, 2014

con in can

ቤት ጽሕፈት ቆንስል መንግስቲ ኤርትራ ኣብ ካናዳ፣ ኣብታ ሃገር ዝርከቡ ደገፍቲ መንግስቲ 2 ሚእታዊት ካብ እቶቶም ብምኽንያት ናይ ክረምቲ ዕረፍቲ ናብ ኤርትራ ኣብ ዝገሽሉ ክኸፍልዎ ይሕብሮም ኣሎ።

እቲ ቤት ጽሕፈት ነዚ ዝሕብር ዘሎ፣ መንግስቲ ካንዳ፣ ምኽፋል ክልተ ካብ ሚእቲ ሕጋዊ ኣይኮነን ብዝብል ነቲ ነቲ ቆንስል ክዓጽዎ ምዃኑ ኣብ ዘጠንቕቐሉ ዘሎ ግዜ’ዩ።

መንግስቲ ካናዳ፣ ብሰንኪ’ዚ ዘይሕጋዊ ዝብሎ ምኽፋል ክልተ ካብ ሚእቲ ንዝሓለፈ ዓመት ንቖንስል መንግስቲ ኤርትራ ካብ ቶሮንቶ ክሰጎ እንከሎ፣ እቲ መስርሕ ምኽፋል ክልተ ካብ ሚእቲ ብዘይምቁራጹ ድማ ንቤት ጽሕፈት ቆንስል መንግስቲ ኤርትራ ጠቕሊሉ ክዓጽዎ ምዃን’ዩ ዘጠንቕቕ።

Radio Erena: 11 July, 2014

Eri In sud

መንግስቲ ሱዳን፣ ኤርትራውያን ስደተኛታት ገፊፉ ናይ ምምላስ መስርሕ ኣብ ዝቕጽለሉ ዘሎ እዋን፣ ኣብዚ ሳልስቲ’ዚ’ውን ተወሰኽቲ 28 መንእሰያት ናብ ኤርትራ መሊሱ።

ካብቶም መንግስቲ ሱዳን ናብ ኤርትራ ዝመለሶም ኤርትራውያን ትሕቲ ዕድመ ቆሎኡን ደቂንስትዮን’ውን ከምዝርከብኦም እቲ ዝበጽሓባ ሓበሬታ የረጋግጽ።

መንግስቲ ሱዳን፣ ናብ ሊብያ ክሰግሩ ዝፈተኑን ኣብ ካርቱም ሕጋዊ መንበሪ ፍቓድ ዘይብሎም ጸኒሖምን ንዝበሎም ኤርትራውያን ኢትዮጵያውያንን ምግፋፍ ካብ ዝጀመረሉ ክሳብ እዚ እዋን’ዚ ኣስታት 300 ኤርትራውያን ናብ ኤርትራ መሊሱ ኣሎ።