ዜና ኤርትራ

Radio Erena: 11 February 2019

ኣብ ኢትዮጵያ፣ ቀጽሪ ቤት ጽሕፈት ሕብረት ኣፍሪቃ፣ ሓወልቲ ንጉስ ሃይለስለሴ ተሃኒጹ።

እቲ ሓልወቲ፣ ትማሊ ሰንበት 10 ለካቲት፣ ብምኽንያት 32 ስሩዕ ዋዕላ መራሕቲ ሃገራት ሕብረት ኣፍሪቃ'ዩ ተመሪቑ።

እቲ ሓወልቲ፣ ንዝኽሪ ናይቲ ንጉስ ሃይለስላሴ፣ ኣብ ምምስራት እቲ ሕብረት ዝነበሮ ኣበርክቶ ንምግላጽ ዝዓለመ'ዩ ተባሂሉ።

እንተኾነ፣ እቲ ንልዕሊ 44 ዓመታት ንኢትዮጵያ ዝመርሐ ንጉስ፣ ኣብ ልዕሊ ህዝቢ ኤርትራ፣ ህልቂትን ግፍዕታት ከምዝፈጸመ ኣይርሳዕን።

ብሰንኪ እቲ ናይ ንጉስ ሃይለስላሴ ግፍዕታት፣ ሓያሎ ዓድታት ኤርትራ ከምዝተቓጸላ፣ ኣሽሓት ኣዴታት ምስ ደቀን ከምዝተረሸናን መንእሰያት ኣብ ጎደናታት ከምዝተሓንቁን ኣብ ትሪኽ ህዝቢ ኤርትራ ተሰኒዱ ዝርከብ ሓቂ'ዩ።

Radio Erena: 10 February 2019

ሕብረት ኤውሮጳ፣ ንወደባት ኤርትራ ምስ ኢትዮጵያ ዘራኽብ መስመራት ጽርጊያ ንምጽጋን ናይ 20 ሚልዮን ዩሮ ሓገዝ ሰሊዑ።

ኮሚሽነር ኣህጉራዊ ምትሕግጋዝን ምዕባለን ሕብረት ኤውሮጳ ነቨን ሚሚምካ ኣብ ኤርትራ ድሕሪ ዘካየዶ ምብጻሕ እዩ፣ እቲ ሕብረት ብራስለስ ካብ ዝርከብ ቤት ጽሕፈቱ ነዚ መግለጺ ኣውጺኡ።

እቲ መግለጺ፣ ኣብ መንጎ ኤርትራን ኢትዮጵያን ንዝህሉ ንግዳዊ ምልውዋጥን ምንቅስቓስ ሰብን ኣሳልጦ ንምግባር፣ እቲ መስመራት ክጽገን ኣገዳሲ ስለዝኾነ፣ ሕብረት ኤውሮጳ ናይ 20 ሚልዮን ዩሮ ንመንግስቲ ኤርትራ ሓገዝ ክገብር ከምዝወሰነ የፍልጥ።

Radio Erena: 08 February 2019

ሰራዊት ኢትዮጵያ፣ መበል ሻውዓይ መዓልቲ ምክልኻል፣ ኣብ ጓል ባድመ ከምዝጸንበለ ካብ ትግራይ ዝተመሓላለፈ ዜና ኣፍሊጡ።

እቲ ምስ ኤርትራ ኣብ ዘዳውብ ከባቢታት ሰፊሩ ዝርከብ፣ ብእዚ ሰሜን ዝጽዋዕ ሰራዊት ኢትዮጵያ፣ ኣብ ጓል ባድመ፣ ድሙቕ ወትሃደራዊ ምርኢትን ጽምብልን ዘካየደ፣ ፕረዚደንት ኢሳይያስን ቀዳማይ ሚኒስተር ኣብይ ኣሕመድን፣ ንባድመ ዝምልከት ጉዳይ ንጎኒ ብምጉሳይ፣ ንህዝቢ ንጹር ብዘይኮነ ርክባት ኣብ ዝቕጽልዎ ዘለዉ እዋን'ዩ።

ኣብቲ ኣብ ጓል ባድመ ዝተኻየደ ጽምብል፣ ብኣጋር ሰራዊትን ከበድቲ ብረትን ዝተሰነየ ወትሃደራዊ ምርኢት ቀሪቡ።

ሰራዊት ኢትዮጵያ ካብ ባድመ ከይሰሓበ፣ ምስ ኢትዮጵያ ዝኾነ ዝርርብ ኣይንገብርን ኢና እናበለ 20 ዓመታት ዝጸንሐ ፕረዚደንት ኢሳይያስ፣ ኣብዚ እዋን'ዚ ምስ ቀዳማይ ሚኒስተር ኣብይ ኣሕመድ ብዘካይዶ ዘሎ ርክባት፣ ጉዳይ ባድመ ከም ኣርእስቲ'ውን ከይልዓል ካድራቱ ጽዑቕ ጎስጓስ የካይዱ ከምዘለዉ ይፍለጥ።

Radio Erena: 08 February 2019

ኣብ ኢትዮጵያ ኣብ ዝካየድ ዘሎ ናይ ለውጢ መድረኽ፣ ዝተፈላለዩ ፖለቲከኛታትን ምሁራትን እታ ሃገር፣ ኣብ ዘካይድዎ ዘለዉ ዘተን ክትዓትን፣ ንሉኣላውነት ኤርትራ ዝጻረር ርእይቶታት ይህቡ ኣለዉ።

ብፍላይ ኣብ ጉዳይ ወደብ ዓሰብ ብዝምልከት፣ "ኢትዮጵያ ነቲ ወደብ ናይ ምውናን ሕጋዊ መሰል ኣለዋ" ኣብ ዝብል ነጥቢ ናይ ዘተ መድረኽ ምኽፋቶም፣ ንሉኣላውነት ሃገረ ኤርትራ ዝቓወም መርገጺታት ዘግህድ'ዩ።

መራሕቲ ኤርትራን ኢትዮጵያን ጀሚሮም ዘለዉ ንህዝቢ ኤርትራ ንጹር ዘይኮነ ርክባት፣ ብወገን ብዙሓት ኢትዮጳውያን፣ ኤርትራ ናብ ኢትዮጵያ ከምዝተመልሰት ክሳብ ዝሕሰብ በጺሑ ይርከብ።

ኣብ ብዙሕ ኣጋጣሚታት'ውን፣ ኢትዮጵያውያን፣ ንኤርትራ ዝሓወሰት ካርታ ኢትዮጵያ እናልዓሉ፣ ሰለማዊ ሰልፍታት ከካይዱ ይርኣዩ'ዮም።

Radio Erena: 08 February 2019

ፕረዚደንት ኢሳይያስ ኣፈወርቂ፣ ኣብ ኣቡዳቢ፣ ሕክምናዊ ክንክን ንዝግበረሉ ዘሎ ጀነራል ስብሓት ኤፍሬም በጺሑ።

ዛጊት መንነቱ ብዘይተነጸረ ሰብ፣ ኣብ ዝሓለፈ ወርሒ፣ ኣብ ኣስመራ ከቢድ መጥቃዕቲ ዝወረዶ ጀነራል ስብሓት ኤፍሬም፣ ኣብ ኣቡዳቢ ኣብ ዝርከብ፣ ዛይድ ወትሃደራዊ ሆስፒታል ሕክምና ይካየደሉ ከምዘሎ ነዚ ሓበሬታ ዝልኣኹ ምንጭታት ኣፍሊጦም።

ጀነራል ስብሓት ኤፍሬም፣ ኣብ ቀረባ ናብ ኤርትራ ተመሊሱ ዝተረፈ ሕክምንኡ ክከታተል ትጽቢት ከምዘሎ ናይ ቀረባ ፈለጥቱ ይሕብሩ።

ቀንዲ ዕላማ ዑደት ፕረዚደንት ኢሳይያስ፣ ንጀነራል ስብሓት ኤፍሬም ምብጻሕ እኳ እንተኾነ፣ ትማሊ 6 ለካቲት ንእግረ መንገዱ ምስ ወራስ ዓራት ኣቡዳቢን ምክትል ኣዛዚ ሰራዊት ሕቡራት ኢማራት ዓረብን ሸኽ መሓመድ ቢን ዛይድ ኣል ናህያን ተራኺቡ ሓጺር ርክብ ኣካይዱ'ዩ።