ዜና ኤርትራ

Radio Erena: 30 January 2019

ምስቲ ኣብ 31 ጥቅምቲ 2017 ኣብ ኣስመራ ዝተኻየደ ተቓውሞ ተማሃሮ ዲያእ ኣል እስላምያ ብዝተሓሓዝ ተኣሲሮም ዝጸንሑ፣ ሓጂ ኢብራሂም ዮኑስ ዝተባህሉ ኣቦ፣ ኣብ ቤት ማእሰርቲ ዓሪፎም።

እቶም ሓደ ካብ ኣባላት ኮሚቴ ናይታ ኣብ ኣኽርያ እትርከብ ቤት ትምህርቲ ዝኾኑ ኣቦ፣ ኣብ ሓሙሻይ መደበር ፖሊስ ተኣሲሮም ድሕሪ ምጽናሕ ሎሚ ሮቡዕ፣ 30 ጥሪ ከምዝዓረፉ ነዚ ሓበሬታ ዝልኣኹ ምንጭታት ኣረጋጊጾም።

Radio Erena: 30 January 2019

ካብ ኤርትራ፣ ሪፈር ዝተባህሉ ኤርትራውያን ተሓከምቲ፣ ኣብ ሆስፒታላት ትግራይ ሕክምናዊ ኣገልግሎታት ይወሃቦም ከምዘሎ ተሓቢሩ።

ቴሌቪዥን ድምጺ ወያነ ኣብ ዘመሓለለፈቶ ጸብጻብ፣ ድሕሪ'ቲ ኣብ መንጎ ኤርትራን ኢትዮጵያን ዝተጀመረ ርክብ፣ ካብ ኣስመራ፣ ሆስፒታል ሓሊበት ሪፈር ንዝተባህለ ወዳ ሒዛ ዝመጸት ኤርትራዊት ዮርሳሌም በራኺ፣ ኣብ መቐለ፣ ሆስፒታል ዓይደር ኣገልግሎት ትረክብ ከምዘላ ከም ኣብነት ኣቕሪባ።

Radio Erena: 28 January 2019

ኣብዚ ወርሒ'ዚ ዝተኸፍተ ዶብ ኦምሓጀር-ሑመራ ንኢትዮጵያውያን ነጋዲ እንተዘይኮይኑ ንኤርትራውያን ዕጽው ከምዘሎ ምንጭታት ሬድዮ ኤረና ሓቢሮም።

ብወገን ኢትዮጵያ ዝመጹ ከም ፈሓም፣ ቡን፣ ኣእካል፣ ቢራ፣ ናይ ህንጻ ኣቑሑን ካልእ ነገራትን ዝሓዙ ነጋዲ፣ ብዘይዝኾነ ጸገም ናብ ኤርትራ ክሰግሩ እንከለዉ፣ ብወገን ኤርትራ ንዝመጽኡ ነጋዶ ግና፣ "ፍቓድ የብልኩም" እናተባህሉ ይኽልከሉ ከምዘለዉ እቶም ምንጭታት ኣመልኪቶም።

Radio Erena: 30 January 2019

መራሕቲ ኤርትራን ኢትዮጵያን፣ ብዛዕባ'ታ ኣውራ ምኽንያት መወልዒ ኵናት ዝኾነት ባድመ፣ ዝኾነ ዓይነት ዝርርብ ከምዘየካየዱ ሬድዮ ኤረና ዝተወከሰቶ ዲፕሎማሰኛ መንግስቲ ኤርትራ ኣረጋጊጹ።

ኣብዚ እዋን'ዚ፣ ነቲ ምስ ኢትዮጵያ ተጀሚሩ ዘሎ ርክብ እትከታተል ብሚኒስተር ዑስማን ሳልሕ፣ ኣቶ የማነ ገብርኣብን፣ ኣምባሳደር ኣብ ኢትዮጵያ ኮይኑ ዝተመዘዘ ሚኒስተር ሰመረ ርእሶምን ዝርከብዋ ሓሙሽተ ዝኣባላታ ኮሚሽን ቆይማ ከምዘላ ዝሓበረ እቲ ዲፕሎማሰኛ፣ ብወገን ኢትዮጵያ ንዝተላእከ እማመታት፣ ኣጠቓቕማ ወደብ፣ ሕጋዊ ምስግጋር ሰብን ንብረትን ኣብ ዝብሉ ነጥብታት ተተኩር ከምዘላ ኣፍሊጡ።

Radio Erena: 27 January 2019

ኤምባሲ ኢትዮጵያ ኣብ ብሪጣንያ፣ ብዛዕባ’ቲ ኣብ ዱባይ ንኤርትራ ምስ ኢትዮጵያ ሓዊሱ ዝተሰርሐ ካርታ ይቕሬታ ሓቲቱ።

ኣብ ሓያሎ ህዝባዊ በዓላት ኢትዮጵያውያን ንካርታ ኤርትራ ምስ ኢትዮጵያ ሓዊሶም ብምስኣል ፖስተራት ምስራሕ ዳርጋ ከም ልሙድ እንዳኾነ ኣብ ዝመጻሉ ዘሎ እዋን፣ ኣብ ወጻኢ ኣብ ልዕሊ ዝርከቡ ኤርትራውያን ሓያል ቁጠዐ ኣስዒቡ’ዩ።