ዜና ኤርትራ

 Radio Erena: 14 February 2019

ፕረዚደንት ጅቡቲ እስማዒል ዑመር ገለ፣ ብዛዕቲ ኣብ መንጎ ሃገሩን ኤርትራን ዘሎ ዘይተፈትሐ ጉዳያት ብዝምልክተ ምስ ፕረዚደንት ኢሳይያስ ኣፈወርቂ ክዘራረብ ቅሩብ ከምዘሎ ገሊጹ።

ንሱ ምስ መደበር ቴሌቪዥን ፍራንስ 24 ኣብ ዝገበሮ ቃለ መጠይቕ፣ ምስ ኤርትራ ንኣስታት 10 ዓመታት ዝጸንሐ ምውጣጥ ንምፍታሕ ቀዳማይ ሚኒስተር ኣብይ ኣሕመድ ንዝወሰዶ ተበግሶ ድሕሪ ምምጓስ፣ ንግስነት ስዑዲ ዓረብ ብወገኑ ምስ ፕረዚደንት ኢሳይያስ፣ ኣብ ጅዳ ንክራኸቡ ንዝገበሮ ኣበርክቶ ንኢዱ።

ኣብቲ ናይ ጅዳ ርክብ፣ ፕረዚደንት ኢሳይያስ ነቲ ምስ ጅቡቲ ዝጸንሐ ዘይምርድዳእ ንምፍታሕ ቅሩብ ከምዘሎ ቃል ስለዝተወ፣ ብወገና'ውን ድሉዋት ኣሎና ዝበለ ፕረዚደንት እስማዒል ዑመር ገለ፣ ክልትኤም መራሕቲ ክራኸቡ መደብ ከምዘሎ'ውን ኣተንቢሁ።

Radio Erena: 14 February 2019

ደረፍቲ፣ ሳዕሳዕትን ተላሃይትን ዝርከብዎም ልዕሊ 50 ኣባላት ዝሓቖፈ ልኡኽ ባህሊን ዲፕሎማስን ህግደፍ ናብ ኢትዮጵያ ኣትዩ።

እቲ ሎሚ14 ለካቲት ናብ ኣዲስ ኣበባ ዝኣተወ፣ ገዲም ድምጻዊ በረኸት መንግስትኣብ ዝርከቦም፣ ልኡኽ ባህሊን ዲፕሎማሲን ህግደፍ፣ ኣብ ዝተፈላለያ ክልላት ኣምሓራን ኦሮሞን ንህዝቢ ምርኢት ከቕርብ'ዩ።

ይኹን'ምበር እቲ ብስም "ጽምብል ሰላም" ናብ ኢትዮጵያ ኣትዩ ዘሎ ልኡኽ ህግደፍ፣ ኣብቲ ብቋንቋን ባህልን ዝመሳሰሎ ህዝቢ ክልል ትግራይ፣ ምርኢት ከምዘየቕርብ ተፈሊጡ ኣሎ።

Radio Erena: 14 February 2019

ኤርትራ፣ ኣብቲ ካብ 15 ክሳብ 25 ነሓሰ ኣብ ፈረንሳ ዝካየድ ቅድድም ብሽክለታ ዙር ለ'ኣቨኒኽ ክትሳተፍ ፣ ናይ ክብሪ ዕድመ ከምዝቐረበላ ጋዜጣ ለ'ኢኵፕ ኣፍሊጣ።

ኤርትራ፣ ኣብዚ ምስ ዙር ፈረንሳ ተመሳሳልነት ዘለዎ ቅድድም ክትሳተፍ፣ ናይ ክብሪ ዕድመ ዝቐረበላ፣ ዝሓለፈ ሰሙን ኣብ ካሜሮን ኣብ ዝተኻየደ፣ ዙር ለ'ኤስፕዋኽ ኣብ ዝተኻየደ ቅድድም፣ ሃገራዊት ጋንታ መንእሰያት ቅድድም ብኽሽክለታ ኤርትራ፣ ተዓዋቲት ብምዃና'ዩ።

ኣብ ዝሓለፈ ዓመት፣ ተዓዋቲት ናይቲ ኣብ ጋቦን ዝተኻየደ ዙር ኣሚሳ ቦንጎን፣ ኣብ ካሜሮን ዝተኻየደ ቅድድም ብሽክለታ ትሕቲ 23 ዓመት ዙር ለ'ኤስፕዋኽን ዝኾነት ርዋንዳ፣ ኣብዚ ናይ ፈረንሳ ዙር ለ'ኣቨኒኽ ናይ ክብሪ ዕድምቲ ኮይና ምውድዳራ ኣይርሳዕን።

Radio Erena: 14 February 2019

ፕረዚደንት ክልል ኦሮምያ ኣቶ ለማ መገርሳ፣ ብምኽንያት ጽምብል መበል ሻውዓት ምልኻል ሃገር፣ ምስ ህዝቢ ኣብ ዘካየዶ ዘተ፣ "መን ይፈልጥ ንመጻኢ ኣፍደገ ባሕሪ ይህልወና ይኸውን ክብል ዝሃቦ መግለጺ ኣብ ማሕበራዊ ሜድያታት ኤርትራን ኢትዮጵያን ኣዛራቢ ጉዳይ ኮይኑ ኣሎ።

ኣቶ ለማ መገርሳ፣ "ኢትዮጵያ ኣፍደገ ባሕሪ ዘይብላ ክነሳ፣ ስለምንታይ ሓይሊ ባሕሪ የድልያ ኣሎ?” ንዝብል ካብ ህዝቢ ዝቐረበሉ ሕቶ፣ ኣብ ዝሃቦ መልሲ'ዩ ነዚ ገሊጹ።

ንሱ፣ ሓይሊ ባሕሪ ንምውናን ናይ ግድን ኣፍደገ ባሕሪ ኣየድልን። ኣፍደገ ባሕሪ ዘይብለን፣ ሓይሊ ባሕሪ ዝውንና ሃገራት ኣለዋ ድሕሪ ምባል፣ ኣፍደገ ባሕሪ እንተዝህልወና ጽቡቕ'ዩ። ምናልባት'ውን መን ይፈልጥ ንመጻኢ ይህልወና ይኸውን ክብል'ዩ መሊሱ።

Radio Erena: 13 February 2019

ምስቲ ብ31 ጥቅምቲ ኣብ ኣኽርያ ዝተኻየደ ተቓውሞን ድሕሪኡ ዝሰዓበ ምእሳር ወለዲን ተማህሮን ብዝተሓሓዝ ተኣሲሮም ዝጸንሑ ሓጂ መሓመድ ኣብራር ተፈቲሖም።

ኣብ ክሊ ዕድመ 70ታት ዝርከቡ ሓጂ መሓመድ ኣብራር፣ ድሕሪ ኣብ ኣኽርያ ዝተኻየደ ተቓውሞን፣ ሓያሎ ወለዲ፣ መማህራንን ተማሃሮን ድሕሪ ምእሳሮም፣ ኣብ መስጊድ ኣል ኹላፋ ኣልራሺዲን ኣብ ዘስምዕዎ መደረ፣ ስርዓት ህግደፍ ንዝወሰዶ ቆልዑን ኣዴታትን ናይ ምእሳር ስጉምቲ ብትሪ ዝነቐፉ ኣቦ'ዮም።