ኣህጉራዊ ዜና

Radio Erena: 04 February 2019

ስዑዲ ዓረብ ብክሲ ብልሽውና ኣሲራቶም ካብ ዝጸንሐት ዜጋታት ሓደ ዝኾነ፣ ሸኽ መሓመድ ሑሰን ኣል ኣሙዲ፣ ኣብ ዝሓለፈ ሰሙን ካብ ቤት ማእሰርቲ ከምዝተፈትሐ ኣብ ዝግለጸሉ ዘሎ ግዜ፣ ዝነበሮ ናይ ልዕሊ 10 ቢልዮን ዶላር ውህሉል ሃብቲ፣ ብ9 ቢልዮን ከምዘንቆልቖለ ተሓቢሩ።

ኣብ ሃብቲ ውልቀሰባትን ትካላትን መጽናዕቲ ዘካየድ መጽሄት ፎርብስ ብዝዘርግሖ ሓበሬታ መሰረት፣ ብዘዋህለሎ ናይ 10.9 ቢልዮን ዶላር ሃብቲ፣ ኣብ ዓለም ምስ ቀዳሞት 20 ዝስራዕ ዝነበረ ሸኽ ኣል ኣሙዲ፣ ኣብዚ እዋን'ዚ ውህሉል ሃብቱ ናብ 1.2 ቢልዮን ዶላር ኣንቖልቝሉ፣ ደረጅኡ ድማ ናብ 159 ወሪዱ ይርከብ።

Radio Erena: 03 February 2019

ብመንገዲ ሱዳን ናብ ኢትዮጵያ ዝኣቱ ዘሎ ዘይሕጋዊ ኣጽዋር፣ ንመንግስቲ ኢትዮጵያ ኣዝዩ ኣሻቒሉዎ ከምዘሎ ካብታ ሃገር ዝተፈነወ ዜና ኣረጋጊጹ።

ሚኒስትሪ ጉዳያት ወጻኢ ኢትዮጵያ ንባይቶ ሃገሩ ብሰሉስ 29 ጥሪ ኣብ ዝሃቦ መግለጺ፣ መንግስቲ ሱዳን ዶባቱ ብግቡእ እንተዘይተቖጻጺሩ፣ ዲፕሎማስያዊ ርክብ ክልቲኤን ሃገራት ኣብ ሓደጋ ከምዝወድቕ ኣፍሊጡ።

Radio Erena: 01 February 2019

ንግስነት ስዑዲ ዓረብ፣ ኣብ ጎኒ ፕረዚደንት ሱዳን ዑመር ሓሰን ኣል በሽሪ ከምዘላ መግለጺ ካቢነ ሚኒስተራት እታ ሃገር ኣፍሊጡ።

ካቢነ ሚኒስተራት ስዑዲ ዓረብ፣ ብሰሉስ 29 ጥሪ ኣብ ዘውጽኦ መግለጺ፣ ምውሓስ ጸጥታን ድሕነትን ሱዳን ማለት ምሕላው ጸጥታን ድሕነትን ስዑዲ ዓረብ'ዩ ንዝብል መርገጺ ንጉስ ሳልማን ኣድኒቑ።

Radio Erena: 03 February 2019

ሕቡራት መንግስታት ኣመሪካ ኣብ ልዕሊ ኣልሸባብ ናይ ሶማል እተካዪዶ መጥቃዕቲ ነፈርቲ ብዝለዓለ ናህሪ ትቕጽሎ ኣላ።

ኣብቲ ዝሓለፈ ዓርቢ፣ ካብ ከተማ ሞቓድሾ 45 ኪሎሜተር ርሒቑ ኣብ ዝርከብ ዓዲ ዝተኻየደ ናይ ነፈርቲ መጥቃዕቲ፣ 24 ኣባላት ኣልሸባብ ከምዝተቐትሉ፣ ወተሃደራዊ እዚ ‘ኣፍሪኮም’ ሓቢሩ።

Radio Erena: 31 January 2019

ኣብ ኢትዮጵያ ወግዓዊ ናይ ስራሕ ምብጻሕ ዘካየደ ፕረዚደንት ጀርመን ፍራንክ ቫልተር ስተይንሚየር፣ ብሰንኪ ምብልሻው ነፋሪት ዑደት ከምዝተናውሐ ተፈሊጡ።

እቲ ፕረዚደንት ኣብታ ሃገር ናይ ኣርባዕተ መዓልታት ዑደቱ ዛዚሙ፣ ብሮቡዕ ናብ ሃገሩ ኣብ ዝተበገሰሉ፣ ነፋሪት ቴክኒካዊ ጸገም ስለዘጋጠማ፣ ናብ ሆቴሉ ክምለስ ከምዝተገደደ ማዕከናት ዜና ኤውሮጳ ኣረጋጊጸን።