ኣህጉራዊ ዜና

Radio Erena: 17 February 2019

ኢትዮጵያ ምስ ናይ ጂቡቲ ወደብ ዘራኽባ ናይ ጋዝ ቱቦ ክትዝርግሕ ኣብ ስምምዕ ከምዝተበጽሐ ሺን ሁዋ ሓቢሩ።

ሚኒስትሪ ማዕድን ኢትዮጵያ ብወገኑ ነዚ ብዝምልከት ኣብ ዝሃቦ መግለጺ፣ እቲ ትማሊ 16 ለካቲት ዝተበጽሐ ስምምዕ፣ 765 ኪሎሜተር ዝዝርጋሕ ሻምብቆታት ጋዝ ዘጠቓለለ ምዃኑ ኣፍሊጡ።

ነዚ ካብ ዞባ ሶማሊ ናይ ኢትዮጵያ ክሳብ ወደብ ጂቡቲ ዝዝርጋሕ ሻምብቆታት ጋዝ ንምህናጽ፣ ፖሊ ጂ.ሲ.ኤል. ዝተባህለ ቻይናዊ ኩባንያ ኩንትራት ከምዝወሰደ’ውን ኣብቲ ኣጋጣሚ ተገሊጹ።

Radio Erena: 17 February 2019

ጻውዒት ህዝቢ ሱዳን ንፖለቲካዊ ለውጢ፣ ዓወት ክረክብ ድሌት ኣመሪካ ምዃኑ፣ ጸሓፊ ጉዳያት ኣመሪካ ገሊጹ።

ማይክ ፓምፐዮ ብዕለት 14 ለካቲት ኣብ ዝሃቦ ቃል፣ እዚ ብህዝቢ ሱዳን ተላዒሉ ዘሎ ሕቶ ፖለቲካዊ ለውጢ፣ ግቡእ ምላሽ ረኺቡ ሱዳን ናብ ዝሓሸ ፖለቲካዊ ምሕደራ ክትሰጋገር ድሌት ሃገሩ ምዃኑ ገሊጹ።

ማይክ ፓምፐዮ ንህዝባዊ ናዕቢ ሱዳን ክድግፍ ናይ መጀመሪያ ኣመሪካዊ በዓል ስልጣን እዩ።

Radio Erena: 12 February 2019

ሚኒስተራት ጉዳያት ወጻኢ ጅቡትን ግብጺን ኣብ ጸጥታ ቀይሕ ባሕሪ ዘተኮረ ዘተ ከምዘካየዱ ኣፈኛ ሚኒስትሪ ጉዳያት ወጻኢ ግብጺ ኣብ ዝዘርግሖ መግለጺ ኣፍሊጡ።

ክልቲኦም ሚኒስተራት ነዚ ዘተ ዘካየዱ ጎኒ ጎኒ'ቲ ኣብ ኣዲስ ኣበባ ዝተኻየደ ዋዕላ ሕብረት ኣፍሪቃ'ዮም።

ጅቡቲ፣ ኣብ ሎጂስቲክ ናጻ ዞባ ዘገልግል ሓደ ትርብዒት ኪሎሚተር ንግብጺ ክትህባ፣ ክልቲኤን ሃገራት ኣቐዲመን ኣብ ስምምዕ በጺሐን'የን።

እዚ ከምዚ'ሉ እንከሎ፣ ፕረዚደንት ግብጺ፣ እዋናዊ ኣቦ መንበር ሕብረት ኣፍሪቃ ኮይኑ።

Radio Erena: 14 February 2019

ሕብረት ኣፍሪቃ ኣብ ሶማል ኣዋፊርዎ ዝርከብ ብዝሒ ዓቃብ ሰላም ሰራዊት ከጉድል ምዃኑ ኣፍሊጡ።

ብመሰረት ወጺኡ ዘሎ መደብ፣ ኣብ መወዳእታ ናይዚ ወርሒ'ዚ ኣስታት ሓደ ሽሕ ወትሃደራት ዓቃብ ሰላም ሰራዊት ካብ ሶማል ክስሕቡ'ዮም።

እዚ ናይ ምስሓብ መደብ ናብ ግብሪ ዝሰጋገር ዘሎ፣ ላዕለዎት ኣዘንዝቲ ሰራዊት ናይቲ ዓቓብ ሰላም ሰራዊት፣ ኣብ ሞቛድሾ ድሕሪ ዘካየድዎ ናይ ኣርባዕተ መዓልታት ምዝርራብ ምዃኑ ተገሊጹ።

ባይቶ ጸጥታ ሕቡራት ሃገራት ሃገራት ኣብ ዘቕረቦ እማመ፣ ሕብረት ኣፍሪቃ፣ ኣብ ሶማል ዝርከብ ሰራዊቱ፣ ክሳብ 2020 ኣብ ዘሎ እዋን፣ ጠቕሊሉ ብምውጻእ፣ ምውሓስ ጸጥታ እታ ሃገር ናብ ሰራዊት መንግስቲ ሶማል ክሰጋገር'ዩ ዝጠልብ።

Radio Erena: 10 February 2019

ሓላፊ ስለያን ጸጥታን ሱዳን፣ ኩሎም ሓይልታት ሰራዊት’ታ ሃገር ኣብ ጎድኒ ፕረዚደንት ኣልበሽር ከምዘለዉ ገሊጹ።

ንሱ ንሓለፍቲ ስለያን ጸጥታን’ታ ሃገር ኣብ ዘካየዶ ኣኼባ፣ ኣብ ሱዳን ፕረዚደንት ዝቕየር ብሕጋዊ ምርጫ ጥራይ እዩ ክብል ድሕሪ ምግላጽ፣ ሓይልታት ሰራዊት ኮኑ ኣባላት ጸጥታ ኣንጻር ኣልበሽር ዝካየድ ዘሎ ኣድማታት ደው ክብል ጻዕርታት ከካዪዱ ጸዊዑ።

ሳላሕ ዓብደላ ነዚ ዝገልጽ ዘሎ፣ ማዕከናት ዜና ምዕራባውያን ሃገራት፣ ፕረዚደንት ኣልበሽር ብሰላም ስልጣኑ ገዲፉ፣ ንሱ ፕረዚደንት መሰጋገሪ መንግስቲ ክኸውን’ዩ ዝብል ዜና ኣመሓላሊፈን ዝብል ወረ ኣብታ ሃገር ብሰፊሑ ይውረ ኣብዘለወሉ እዋን’ዩ።