Human Rights

Radio Erena: 20 January 2019

ሓያሎ ኣባላት ሰራዊት መንግስቲ ኢትዮጵያ ኣብ ሶማልያ ብዝነጥፍ ዘሎ ኣልሸባብ ብዝወረዶም መጥቃዕቲ ተቐቲሎም ተባሂሉ ክዝርጋሕ ዝቐነየ ዜና ሓቂ ምዃኑ ሚኒስትሪ ምክልኻል ኢትዮጵያ ኣፍሊጡ።

እቲ ሚኒስትሪ ምክልኻል ትማሊ 19 ጥሪ ኣብ ዘውጸኦ ወግዓዊ መግለጺ፣ ናይዚ ኣብ ልዕሊ ሰራዊት ኢትዮጵያ ወሪዱ ዘሎ መጥቃዕቲ ምላሽ፣ ከቢድ ጸረ-መጥቃዕቲ ከካዪድ ምዃኑ ኣፍሊጡ።

Radio Erena: 12 December 2018

Sand transporting cars

ኣብ ኤርትራ፣ ሑጻ ዘመላልሳ ናይ ጽዕነት መካይን ተኣጊደን ከምዘለዋ ምንጭታት ሬድዮ ኤረና ሓቢሮም።

ሑጻ ጽዒነን ክንቀሳቐሳ ዝተታሕዛ ናይ ጽዕነት መካይን፣ ኣብ ከባቢ ሓዲ ሃሎ ተኣኪበን ከምዘለዋ ዝሓበሩ እቶም ምንጭታት፣ ናይ ውልቂ መንበሪ ኣባይቲ ምትዕርራይ ከምዝከኣል ተፈቒዱ እኳ እንተሎ፣ ሑጻ ዘመላልሳ መካይን ምእጋደን ግና ዕንቕፋት ክፈጥር ከምዝኽእል የመልክቱ።

ኣስታት ክሳብ 3 ሽሕ ናቕፋ ዝነበረ፣ ዋጋ ሓንቲ መኪና ሑጻ፣ ብሰንኪ እዚ ተወሲዱ ዘሎ ስጉምቲ ናብ ልዕሊ 5 ሽሕ ናቕፋ ከይዓርግ ይስጋእ።

ካብ ኢትዮጵያ ዝኣቱ ዘሎ ሰሜንቶን ካልእ ናይ ህንጻ መሳርሒታትን ዕዳጋታት ኣረጋጊኡ ኣብ ዘለወሉ ግዜ፣ ህዝቢ ኣባይቱ ንምትዕርራይ ክጓየ'ዩ ጸኒሑ።

Radio Erena: 12 December 2018

minister of sudan

ግብጽን ሱዳንን ዝምስርትኦ ዘለዋ ወትሃደራዊ ምሕዝነት ንምድልዳሉ ዝዓለመ ርክባት ኣካይደን።

ኣብ ግብጺ ምብጻሕ ዘካየደ፣ ብሚኒስተር ምክልኻል፣ ጀነራል ዓዋድ ኢብን ዓውፍ ዝምራሕ ላዕለዋይ ልኡኽ ሱዳን ምስ ፕረዚደንት ዓብደልፈታሕ ኣል ሲሲ ኣብ ዝተራኸበሉ፣ ኣብ ዶባት ክልቲኤን ሃገራት ዘሎ ጸጥታዊ ስግኣታትን ብሓባር ናይ ምክምካቱ መደባትን ዘትዮም።

ሚኒስተራት ምክልኻል ክልቲኤን ሃገራት ኣብ መወዳእታ ወርሒ ሕዳር'ውን ኣብ ካርቱም ተመሳሳሊ ርክብ ምክያዱ ይዝከር።

ወትሃደራዊ ልኡኽ ሱዳን ናብ ግብጺ ዘምርሐ፣ ኣብ ካይሮ ኣብ ዝተኻየደ ወትሃደራዊ ኤክስፖ ንምስታፍ ኮይኑ፣ ጎኑ ጎኑ ድማ ምስ ሓያሎ ወትሃደራውያን መራሕቲ እታ ሃገር ተዘራሪቡ።

Radio Erena: 08 February 2018

 eri in isrl demoኣብ እስራኤል ዝርከቡ ኤርትራውያን ስደተኛታት፣ ርዋንዳን እስራኤልን ዘካይድኦ ዘለዋ ስምምዕ ምስጓግ ስደተኛታት ንምኹናን ኣብ ክልተ ቅነ፣ ንኻልኣይ እዋኖም ሰፊሕ ሰለማዊ ሰልፊ ኣካይዶም።

እቶም ኣማኢት ኤርትራውያን ትማሊ 7 ለካቲት ኣብ ዘካይድዎ ሰለማዊ ሰልፊ፣ ፍቓድ ኣውጽኦም ክነሶም ናብ ቀጽሪ ኤምባሲ ርዋንዳ ከይቀርቡ ፖሊስ እስራኤል ክኽልክልዎም ከምዝፈተኑ ምንጭታት ሬድዮ ኤረና ካብ ቴልኣቪቭ ሓቢሮም።

Radio Erena: 11 December 2017

Human Right Day

10 ታሕሳስ ኣህጉራዊ መዓልቲ ሰብኣዊ መሰላት ትማሊ ሰንበት ብደረጃ ዓለም ተዘኪሩ።

ብደረጃ ዓለም ኣብ ፓሪስ ተዘኪሩ ዝወዓለ ኣህጉራዊ መዓልቲ ሰብኣዊ መሰላት፣ ነቲ ኣብ 1948 ንዝተኸተመ ውዕላት ኣህጉራዊ ሰብኣዊ መሰላት ብምትሕሳስብ፣ እቲ ቅድሚ 69 ዓመት ዝተኸተመ ውዕላት ገና ብብዙሓት ሃገራት ከምዘይተተግበረ ኣገንዚቡ።

ዋና ጸሓፊ ሕቡራት ሃገራት ኣንትዮንዮ ጉተረስ፣ ብምኽንያት እዛ ዕለት ኣብ ዝሃቦ መግለጺ፣ ሰብኣዊ መሰላት ሓደ ካብ ኣውራ መሕእውራት ንምምስራት እቲ ኣህጉራዊ ውድብ ምዃኑ ጠቒሱ።

ውዕላት ሰብኣዊ መሰላት ንዝፍጸሙ ምግሃስ ሰብኣዊ መሰላት ደው ከብሎ እኳ እንተዘይክኣለ፣ ንዝበዝሑ ህዝብታት ዓለም ግና ዝያዳ ሓርነትን ናጽነትን ከስተማቕሩ ከም መሳርሒ የገልግል ከምዘሎ ኣረዲኡ።