ኣስመራ፣ ኣብ ቤት ክርስትያን እንዳ ማርያም ንምህለላ ዝተኣኻኸባ ኣዴታት፣ ብፖሊስ ከምዝብተና ተጌሩ

Radio Erena: 09 November 2020

ኣብ ትግራይ ድሕሪ ዝካየድ ዘሎ ኵናት ብወገን ኤርትራ ዝካየድ ዘሎ ወትሃደራዊ ምሽብሻባትን ኣብ ልዕሊ ህዝቢ ኤርትራ ከቢድ ሳቕሎት ፈጢርሉ ኣብ ዘሎ እዋን፣ ትማሊ ሰንበት 08 ሕዳር፣ ኣብ ሰዓታት ናይ ንግሆ፣ ኣብ ኣስመራ፣ ቤት ክርስትያን እንዳ ማርያም ንምህላለ ዝተኣኻኸባ ኣዴታት፣ ብፖሊስ ከምዝተበተና ምንጭታት ሓቢሮም።

ፖሊስ፣ ነተን ኣዴታት፣ ምስ ኮረና ቫይረስ ብዝተሓዝ ዝወጸ ኣዋጅ፣ ክትተኣኻኸባ ኣይፍቀድን’ዩ ብዝብል’ዮም በቲኖመን።

እንተኾነል፣ ኣብ ኤርትራ ካብ ስግኣት ኮረና ቫይረስ ንላዕሊ፣ ወራር ዕስለ ኣንበጣን ኣብ ትግራይ ዝካየድ ዘሎ ኵናት ናብ ኤርትራ ከይግንፍልን ዝዓበየ ናይዚ እዋን’ዚ ስግኣት ኮይኑ ኣሎ።

እዚ ከምዚ’ሉ እንከሎ፣ ኣብ ሓያሎ ከባቢታት ኤርትራ፣ ግጻ ብጻዕቂ ይቕጽል ኣሎ።

ይኹን’ምበር፣ ኣብዚ እዋን’ዚ ናብ ኵናት ኣትዩ ዝመወት መንእሰያት ንኸይህሉ፣ ህዝቢ ኤርትራ፣ ካብ ዝሓለፍ ኵናት ተማሂሩ ክነቕሓሉን ብግሁድ ክቃወሞን ዝተፈላለዩ ኤርትራውያን ውድባትን ማሕበራትን ነጠፍተኛታትን መልእኽታቶም ምትሕልላፍ ይቕጽሉ ኣለዉ።

ስእሊ፣- ካብ ኣርካይቭስ ኢንተርነት

================