ኤርትራ፣ ኣብ ሓያሎ ከባቢታት ጽዑቕ ግፋ ይካየድ ኣሎ

Radio Erena: 22 September 2021

ኣስመራ ኣብ ዝርከቦ ሓያሎ ከባቢታት ኤርትራ፣ ጽዑቕ ግፋ ይቕጽል ኣሎ።

ጸጸኒሑ፣ ኣብ ዝተፈላለየ ከባቢታት ብሃንደበትን ብጻዕቅን ዝካየድ ግፋታት፣ ንቡር ህይወት ኤርትራን ህዝባን ካብ ዝኸውን ልዕሊ 20 ዓመታት ሓሊፉ እኳ እንተኾነ፣ እዚ ካብ ዝሓለፈ ቅንያት ኣትሒዙ ዝካየድ ዘሎ ግና ምስቲ ሰራዊት ኤርትራ ኣብ ትግራይ ዘካይዶ ዘሎ ኵናት ምትሕሓዝ ከምዘለዎ’ዮም ነዚ ሓበሬታ ዝልኣኹ ምንጭታት ዝጠቕሱ።

ነዚ ዝሓለፈ ሸሞንተ ኣዋርሕ ኣብ ኵናት ትግራይ ተጸሚዱ ዝርከብ መንግስቲ ኤርትራ፣ 10ታት ኣሽሓት መንእሰያት ኣኽቲቱ፣ ኣሽሓት ዜጋታት ድማ ግዳያት ሞትን መቝሰልትን ጌርዎም ከብቅዕ፣ ንህዝቢ ብዛዕባ ኩነታት ደቁ ሓባሬታ ክህቦስ ይትረፍ ሓበሬታ ከይረክብ’ውን ብጽኑዕ ከምዝቆጻጸሮን ከምዝጸናጸኖን ይፍለጥ።

================