ኢትዮጵያ፣ ኤርትራውያን ሓተቲ ዑቕባ ዘጋጠሞም ዘሎ ናይ ምዝገባ መሰናኽል ይቕጽል

Radio Erena: 11 February 2020

ኣብ ኢትዮጵያ፣ ንኤርትራውያን ብጥሙር ዝወሃበ ዝነበረ ዑቕባ፣ ኣብዚ እዋን’ዚ በብውልቂ ምጽራይ እናተገብረሉ ክቕጽል ምዃኑ ምስ ትካል ኣህጉራዊ ምሕበር ስደተኛታት ቅርበት ዘለዎም ወገናት ንሬድዮ ኤረና ሓቢሮም።

ኣቐዲሙ፣ ናብ ኢትዮጵያ ዝሰገሩ ኤርትራውያን ብዘይ ዝኾነ ዕንቅፋት’ዮም ዑቕባ ዝወሃቡ ኔሮም።

ኣህጉራዊ ማሕበር ስደተኛታት፣ ካብን ናብን ስደተኛታት ዝእከብሉ ማእከላት፣ መጻረዩ ጉዳይ ስደተኛታት እንዳባጉናን መዓስከራትን ንምብጽጻሕ ናይ ነዳዲን ባጀትን ዋሕዲ ከምዝገጠሞ ኣቐዲሙ ተቓሊሑ’ዩ።

ኣብ ርእሲ’ዚ፣ ብወግዒ ዘይተሓበረ ኣሰራርሓ፣ ብዶባት ንዝሰገሩ ይኹኑ ብመንገዲ ኤርፖርት ንዝኣተዉ ኤርትራውያን ዑቕባ ንምሕታት፣ ውልቃዊ ፍሉይ ጉዳይ እንተዘይብሎም፣ ኤርትራውያን ብምዃኖም ጥራይ ዝወሃብ ዝነበረ ዑቕባ መሰናኽል ገጢምዎ ይርከብ።

እዚ ድማ ምስቲ መራሕቲ ኤርትራን ኢትዮጵያን ዝበጽሕዎ ስምምዕን ኣብ መንጎ ክልትኤን ሃገራት ርክብ ሰላም ተጀሚሩ’ዩ ብዝብል ክኸውን ከምዝኽእል ግምታት ኣሎ።

ይኹን’ምበር፣ ሕጂ’ውን መስርሕ ምቕባል ኤርትራውያን ሓተቲ ዑቕባ ደው ከምዘይበለ ሬድዮ ኤረና ዝተወከሰቶም ምስቲ ትካላት ስደተኛታት ቅርበት ዘለዎም ወገናት ኣረዲኦም።

ኣብ ኢትዮጵያ፣ ቤተሰብ ዘለዎም፣ ኣብ መዓስከራት ዑቕባ ከይሓተቱ ናብ ዓድዋ፣ መቐለ፣ ኣዲስ ኣበባን ካልኦት ከተማታት እታ ሃገር ብዘይጸገም ይሰግሩ ምህላዎም’ውን ኣገንዚቦም።

እቶም ምንጭታት ብተወሳኺ፣ መዓስከራት ኢትዮጵያ፣ ብብዝሒ ኤርትራውያን ኣዕለቕሊቑ ከምዘሎ ብምንጻር፣ ኣብ ሽረ፣ መቐለን ዓድዋን ካልኦት ከተማ ትግራይ፣ ዑቕባ ብምሕታት ናብ መዓስከራት ክኣትዉ ዝደልዩ ኤርትራውያን ብብዝሒ ከምዝርኣዩ ኣመልኪቶም።

መንግስቲ ኢትዮጵያ፣ ፍሉይ ፖለቲካዊ ጉዳይ ዘለዎም እንተዘይኮይኑ፣ ንኤርትራውያን ዑቕባ ምሃብ ደው ኣቢሉ እናተባህለ ብማሕበራዊ ሜዳያታት ዝዝርጋሕ ዘሎ ሓበሬታ፣ ኣብታ ሃገር ዝርከባ ትካላት ስደተኛታት ሓቕነት ከምዘይብሉ’የን ዝገልጻ።

እቲ መንግስቲ ከምዚ ዓይነት ስጉምቲ ክወስድ እንተኾይኑ፣ እንተወሓደ ንላዕለዋይ ኮሚሽን ስደተኛታት ሕቡራት ሃገራት (UNHCR) ከፍልጥ ከምዘለዎ’ውን እቶም ነዚ ሓበሬታ ዝሃቡ ወገናት ጠቒሶም።

ኣብ ዝሓለፈ ዓመት ጥራይ በብውልቆምን ምስ ስድራቤታቶምን ዝሰገሩ ልዕሊ 72 ሽሕ ኤርትራውያን ሓተቲ ዑቕባ ኣብ ኢትዮጵያ ከምዘለዉ ሕቡራት ሃገራት ኣብ ዓመታዊ ጸብጻቡ ኣስፊሩ ይርከብ።

===============