ሩዋንዳ፣ ትሕቲ ዕድመ ንዝኾነ ኤርትራዊ ስደተኛ ብምድፋር ዝተኸሰሰ ኣዛዚ ፖሊስ ናጻ ተባሂሉ

Radio Erena: 30 April 2020

ኣብ ርዋንዳ፣ ወዲ 16 ዓመት ንዝኾነ ኤርትራዊ ስደተኛ ብምድፋር ዝተኸሰሰ ኣዛዚ ፖሊስ፣ ብክፍሊ መርመራ ገበን እታ ሃገር ድሕሪ ዝተኻየደሉ ምጽራይ ናጻ ከምዝተባህለ ማዕከናት ዜና ካብ ኪጋሊ ሓቢረን።

እቲ ካብ ሊብያ ተመሊሱ፣ ኣብ ጋሾራ ኣብ ዝርከብ ግዝያዊ መጽንሒ ስደተኛታት ዝነብር ዘሎ ኤርትራዊ፣ ለበዳ ኮረና ቫይረስ ንምግታእ፣ ንዝተኣወጀ ሰዓታት እቶ እቶ ብምጥሓስ ብ13 ሚያዝያ ምስ ክልተ ሱዳናውያን ስደተኛታት ናብቲ መዓስከር ኣብ ዝተመልስሉ እዋን ብፖሊስ ከምዝተታሕዙ’ዩ ተመልኪቱ።

እንተኾነ፣ እቲ ኤርትራዊ ንጽባሕቲ፣ ብኣዛዚ ፖሊስ ከምዝተደፍረ ኣመልኪቱ።

ንሱ ብዝሃቦ ሓበሬታ፣ ድሕሪ ሕላፍ ሰዓት ኣብ ዝተታሕዝሉ፣ እቲ ኣዛዚ ፖሊስ ክዳውንቱ ብሓይሊ ከውጽእ ከምዝኣዘዞ ብምሕባር፣ ኣብ ፈለማ ዝተባህሉ ኩሉ እኳ እንተገበረ፣ ድሒሩ ግና ዕርቃኑ ክወጽእ ከምዘገደዶ’ዩ ጠቒሱ።

ነዚ ትእዛዝ’ዚ ከምዘይፍጽም ድሕሪ ምሕባሩ እቲ ኣዛዚ ፖሊስ ብኣእዳውን ብበትርን ክሃርሞ ምስ ጀመረ ከምዝሃደመ’ዩ ከሲሱ።

ኣፈኛ ወኪል ኮሚሽን ስደተኛታት ኤሊዝ ቪልሻለን ንዘ ጋርድያን ኣብ ዝሃበቶ ሓበሬታ፣ እቲ ፍጻሜ ከምዘሕዘና ብምጥቃስ ነቲ ተደፊረ ዝበለ ትሕቲ ዕድመ ስደተኛ፣ ዘድሊ ምክትታልን ምኽርን ይወሃቦ ከምዘሎ ገሊጻ።

ምስ ላዕለዋይ ኮሚሽን ስደተኛታት ሕቡራት ሃገራት ብምዃን ነቲ ካብ ሊብያ ዝተመልሱ መብዛሕቶም ኤርትራውያን ዝኾኑ ኣማኢት ስደተኛታት ዝዕቖብሉ ግዝዝያዊ መጽንሒ ጋሾራ ዝከታተል ሚኒስትሪ ምሕደራ ህጹጽ እዋናት ርዋንዳ ብወገኑ፣ ነቲ ብኤርትራዊ ዝቐረበ ክሲ ነጺግዎ ኣሎ።

መዓስከር ጋሾራ፣ ኣብ ሊብያ ኣብ ሕማቕ ኩነታት ዝነበሩ መብዛሕትኦም ኤርትራውያን ዝኾኑ ኣስታት 300 ስደተኛታት ዝሕዝ ግዝያዊ መጽንሒ’ዩ።

ሃገራት ኤውሮጳ፣ ናብዚ ግዝያዊ መጽንሒ ዝምለሱ ኣማኢት ስደተኛታት ከጣይሳ ምዃነን’የን ዝገልጻ።

ስእሊ፣- ካብ ሰነዳት ኢንተርነት

ርእይቶ

WORDPRESS: 0