c


Erena on Facebook

SFbBox by web design dubai

ዜና ኤርትራ

ልኡኽ መንግስቲ ኤርትራ ኣብ ግብጺ ወግዓዊ ናይ ስራሕ ምብጻሕ የካይድ

Radio Erena: 20 March 2017

Egypt Eri del

እቲ ብሚኒስተር ጉዳያት ወጻኢ ኤርትራ ኣቶ ዑስማን ሳልሕ ዝተመርሐ ልኡኽ፣ ብ19 መጋቢት ካይሮ ኣብ ዝኣተወሉ ምስ ሚኒስተር ጉዳያት ወጻኢ ግብጺ ሳምሕ ሾክሪ ብምርኻብ ኣብ ህሉው ኩነታት ዞባ ቀርኒ ኣፍሪቃ፣ ብፍላይ ድማ ምስ ኢትዮጵያ ኣብ ዘሎ ኩነታት ከምዝዘተዩ ምንጭታት ዜና ካብታ ከተማ ሓቢሮም።

ብጉዳይ እቲ ኢትዮጵያ ኣብ ከባቢ ናይል እትሃንጾ ዘላ ዲጋ፣ ምስታ ሃገር ኣብ ዘይምቅዳው እትርከብ ግብጺ፣ ምስ ኩለን እተን ምስ ኢትዮጵያ ምትእስሳርን ጽልዋን ኣለወን እትብለን ሃገራት ጽዑቕ ርክባት ኣብ ምክያድ'ያ ትርከብ።

ፕረዚደንት ግብጺ ዓብደልፈታሕ ኣል ሲሲ፣ ኣብዘን ዝሓለፋ ሰለስተ ኣዋርሕ፣ ምስ ፕረዚደንታት ኤርትራ፣ ጅቡቲ፣ ኡጋንዳ፣ ደቡብ ሱዳንን ኬንያን ርክባት ኣካይዱ ኣሎ።

Read more...

ኤርትራ፣ ሃገራዊ ኣገልግሎት ዘይፈጸሙ ዜጋታት ኣብ ስራሕ ኣዋፊረን ዝተባህላ ንኣሽቱ ትካላት ይዕጸዋ

Radio Erena: 20 March 2017

Asmara Shops

መንግስቲ ኤርትራ፣ ዓበይቲ ይኹና ንኣሽቱ ናይ ብሕቲ ትካላት፣ ሃገራዊ ኣገልግሎት ዘይፈጸመ ወይ ከኣ ናይ መጣየሰ መረጋገጺ ንዘየምጽአ ሰብ፣ ኣባ ስራሕ ከየዋፍራ፣ ድሕሪ ዘሕለፎ መጠንቐቕታ፣ ሓያሎ ንኣሽቱ ትካላት ከምዝዓሸገ ምንጭታት ሬድዮ ኤረና ሓቢሮም።

ኣባላት ስድራቤታቶም ሃገራዊ ኣገልግሎት ኣይፈጸሙን ብዝብል ምኽንያት ኣብ ከተማ ከረን፣ ብውሕዱ ክልተ ኣብያተ መግቢ ክዕሸጋ እንከለዋ፣ ኣብ ኣስመራን ካልኦት ከተማታትን'ውን ብተመሳሳሊ ምኽንያት ዝተዓጽዋ ሓያሎ ትካላት ከምዘለዋ እቶም ምንጭታት ጠቒሶም።

እቲ መንግስቲ፣ ብዘይካ ናይ ሃገራዊ ኣገልግሎት ጉዳይ፣ ብብልሽውናን ካልእን እናሳበበ፣ ሓያሎ ትካላት ኣብ ምዕጻውን፣ ንወነንተን ከኣ ኣብ ምእሳርን ከምዝርከብ፣ ንባዕሉ ኣብ ተኣሲሩ ዝነበረን፣ ወናኒ ኣብ ኣስመራ ዝርከብ ሓደ ፍሉጣት ኣብያተ መግቢ፣ ኣብዚ ቀረባ ናብ ስደት ድሕሪ ምምሪሑ ንሬድዮ ኤረና ኣብ ዝሃቦ ቃል ኣረጋጊጹ።

Read more...

መራሒ ሰሜን ኮርያ፣ ኣብታ ሃገር እቲ ዝበለጸ ቅዲ ኣከዳድና ዝኽተል ተባሂሉ ብወግዒ ተሰይሙ

 Radio Erena: 20 March 2017

Kim Jong Un

መራሒ ሰሜን ኮርያ ኪም ጆንግ ኡን፣ ኣብታ ሃገር እቲ ዝበለጸ ቅዲ ኣከዳድና ዝኽተል ተባሂሉ ከምዝተሰየመ ወግዓዊ መግለጺ መንግስታዊ ኣገልግሎት ዜና ሓቢሩ።

ብመሰረት እቲ ብሰነት 19 መጋቢት ዝወጸ መግለጺ፣ መራሒ ሰሜን ኮርያ ኪም ጆንግ ኡን ነዚ ኽብሪ ን20 ዓመታት'ዩ ሒዝዎም።

ወዲ 33 ዓመት ኪም ጆንግ ኡን፣ ብዘይካ'ዚ፣ እቲ ዝመልክዐ መራሒ፣ እቲ ዝሓየለ መራሒ፣ ብፍልጠት ዝወዳደሮ ዘየብሉ መራሒ፣ ብህዝቢ ካብ ዝፍተዉ መራሕቲ ዓለም ቀዳማይ፣ ብደቂንስትዮ ፍቱው.....ወዘተ ዝብል ናይታ ጸብለልታ ማሕበራዊ ክብርታት ብወግዒ ብሒቱ ይርከብ።

Read more...

ሄሊኮፕተራት ኵናት ሃገራት ዓረብ፣ ኣብ ቀይሕ ባሕሪ 42 ሶማላውያን ስደተኛታት ከምዝቐተላ ይግለጽ ኣሎ

Radio Erena: 20 March 2017

42 Somali

ብስዑዲ ዓረብ ዝምራሕ ናይ ልንፍቲ ሰራዊት ሃገራት ወሽመጥ ዓረብ፣ ኣብ ቀይሕ ባሕሪ ብዘያከዶ ናይ ሄሊኮፕተር ደብዳብ፣ ኣብ ጃልባ ዝነበሩ 42 ሶማላውያን ከምዝቐተሉ ተሓቢሩ።

እቲ ናብ ቀዳም18 መጋቢት ኣብ ዘውግሐ ለይቲ፣ ኣብ ልዕሊ ቆልዑን ኣዴታትን ዝርከብዎም ተራ ስደተኛታት ዝተፈጸመ መጥቃዕቲ፣ ግፍዒ ኣብ ልዕሊ ንጹሃት ሰባት ክብል መንግስቲ ሶማል ኮኒንዎ ኣሎ።

እቶም ሶማላውያን፣ ኣብ ቀይሕ ባሕሪ ኣብ እትርከብ ናይ የመን ወደብ ሖዴይዳ፣ ከባቢ ባብ ኤልመንደብ ኣብ ዝበጽሕሉ እዋን፣ ካብ ሄሊኮፕተር ብዝተወንጨፈሎም ሮኬታትን ጠያይትን'ዮም ሃሊቖም።

Read more...

ምብራቕ ኣፍሪቃ፣ 20 ሚልዮን ህዝቢ ሓደጋ ደርቂ ተቓሊዑ ከምዘሎ ተሓቢሩ

Radio Erena: 17 March 2017

Drought

ኣብ ምብራቕ ኣፍሪቃ፣ ኣንጸላልዩ ዘሎ ሓደጋ ደርቂ ንኣስታት 20 ሚልዮን ህዝቢ ጸልዩ ከምዘሎ ኣህጉራውያን ትካላት ይገልጻ።

ነዚ ኣብ ደቡብ ሱዳን፣ ኢትዮጵያ፣ ሶማልን ኬንያን ኣንጸላልዩ ዘሎ ሓደጋ ደርቂ ንምምካት፣ ፕሮግራም መግቢ ዓለም፣ ውድብ መግብን ሕርሻን ካልኦት ኣህጉራውያን ትካላት ረድኤትን ናይ ኣማኢት ሚልዮናት ዶላር ሓገዝ ይሓታ ኣለዋ።

ኣብ ሶማል፣ ኢትዮጵያን ደቡብ ሱዳንን ብፍላይ ኣብ ሰብን ጥሪትን ሞት ኣስዒቡ ከምዘሎ ዝጥቀስ ሓደጋ ደርቂ፣ እቶም ቀንዲ ግዳያት ህጻናትን ኣዴታትን ምዃኖም ይሕበር።

Read more...




Powered by Joomla!®. Designed by: free hosting no ads resell dot me domains Valid XHTML and CSS.