Welcome to Radio Erena!
ልኡኽ መንግስቲ እስራኤል፣ ኣብ ኤርትራ ምስጢራዊ ምብጻሕ ፈጺሙ
Radio Erena: May 1, 2014
ልኡኽ መንግስቲ እስራኤል ኣብ ኤርትራ ምስጢራዊ ምብጻሕ ከምዝፈጸመ ምንጭታት ሬድዮ ኤረና ሓቢሮም።
እቲ ዝሓለፈ ሰሙን ኣብ 23 ሚዝያዝያ ብምስጢር ኣብ ኣስመራ ዝበጽሐ ልኡኽ መንግስቲ እስራኤል፣ ምስ ፕረዚደንት ኢሳይያስ ኣፈወርቂ ብዕጹው ድሕሪ ምዝርራብ ንጽባሕቱ 24 ሚያዝያ ናብ እስራኤል ከምዝተመልሰ’ውን እቲ ዝበጽሓና ሓበሬታ የመልክት።
ዕላማ ሚስጢራዊ ዑደት ልኡኽ መንግስቲ እስራኤል ኣብ ኤርትራ ብንጹር እኳ እንተዘይተፈልጠ፣ ብዛዕባ’ቲ እስራኤል ኣብ ቀይሕ ባሕሪ ዘለዋ ስኽፍታን ኩነታት ኣብ እስራኤል ናይ ዝርከቡ ኤርትራውያንን ንምዝታይ ዝዓለም ክኸውን ከምዝክእል ይግምገም።
ው.ሕ.ሃገራት ኣብ ደቡብ ሱዳን ዝነበሩ 500 ኣባላቱ ናብ ኡጋንዳ ኣግዒዙ
Radio Erena: May 1, 2014
ኩነታት ደቡብ ሱዳን ዘሰከፎ ውድብ ሕቡራት ሃገራት፣ ኣብታ ሃገር ንዝነበሩ ልዕሊ 500 ኣባላቱ ኣውጺእዎም።
እቶም ኣብ ዝተፈላለየ ከባቢታት ደቡብ ሱዳን ተዋፊሮም ዝነበሩ ሰራሕተኛታት ልኡኽ ውድብ ሕቡራት ሃገራት፣ ኣብቲ ዝንቐሳቐስሉ ከባቢታት ኣንጻሮም ዝቐንዐ መጥዕቃዕታት ብምሕያሉ፣ እቲ ውድብ ካብታ ሃገር ከምዘውጽኦም ኣብ ዘቕረቦ ጸብጻብ ኣፍሊጡ።
ፕረዚደንት ሶማል ናብ ጅቡቲ ዑደት ኣካይዱ
Radio Erena: May 1, 2014
ፕረዚደንት ፈደራላዊ መንግስቲ ሶማል ሓሰን ሸኽ ማሕሙድ ኣብ ጅቡቲ ናይ ሓደ መዓልቲ ዑደት ኣካይዱ።
እቲ ፕረዚደንት ኣብ ጅቡቲ ኣብ ዘካየዶ ዑደት ምስ ፕረዚደንት እስማዒል ዑመር ጉለ ብምርኻብ፣ ንክልቲኤን ሃገራት ኣብ ዝጸሉ ህሉው ኩነታት ዞባ ቀርኒ ኣፍሪቃ ዘትዮም።
ፕረዚደንት ሓሰን ሸኽ ማሕሙድ፣ ድሕሪ’ቲ ምስ ፕረዚደንት ጅቡቲ ዘካየዶ ርክብ፣ ምስ ቴሌቪዥን እታ ሃገር ኣብ ዘካየዶ ቃለ መጠይቕ፣ መንግስቲ ሶማል ምስ ኩለን ጎረባብቲ ሃገራት ጥቡቕ ዝምድና ክምስርት ከምዝደሊ ገሊጹ።
ካብ ዓድታት ዞባ ማእከልን ዓንሰባን ናብ ጋሽ ባርካ ክወርዱ ዝተገደዱ ኣስታት 2 ሽሕ ሓረስቶት፣ ኣብ ከቢድ ክሳራ ከምዝወደቑ ገሊጾም
Radio Erena: April 30, 2014
ኣብ ዝሓለፈ ዓመት ካብ ሓያሎ ዓድታት ዞባ ማእከልን ዓንሰባን ናብ ከባቢ ኦምሓጀር ወሪዶም ክሓርሱ ዝወሰኑ ልዕሊ 2 ሽሕ ሓረስቶት፣ ብሰንኪ ምሕደራ መንግስቲ ኣብ ከቢድ ክሳራ ከምዝወደቑ ኣማሪሮም።
እቶም እኹል ማይን ናይ ሕርሻ መሬትን ኣብ ዘይብሉ ዓድታት ዞባ ማእከልን ዓንሰባን ስለዘለኹም መንግስቲ ክሕግዘኩም ናብ ጋሽ ባርካ ውረዱ ተባሂሎም ዝተደፋፍኡ ሓረስቶት፣ ኣብ ከባቢታት ቓጨሮ፣ ኦምሓጀር፣ ሳሙናይትን ጎልጅን ንነፍሲ ወከፎም ከክልተ ሄክታር መሬት ተዓዲልዎም መሸላ እኳ እንተዘርኡ፣ ብሰንኪ ዘይንቡር ክራማትን፣ ምሕደራ መንግስትን ጥራይ ኢዶም ከምዝተረፉ’ዮም ዝገልጹ።
ብዘይሕጋዊ ምስግጋር ደቂ ሰብ ዝተጠርጠረ ኤርትራዊ ኣብ ኣመሪካ ኣብ ቤት ፍርዲ ቀሪቡ
Radio Erena: April 30, 2014
ብዘይሕጋዊ ምስግጋር ደቂ ሰብ ዝተጠርጠረ ኤርትራዊ ሃብቶም መርሓይ ብ28 ለካቲት ኣብ ዋሽንግተን ዲሲ ኣብ ዝርከብ ቤት ፍርዲ ከምዝቐረበ፣ ክፍሊ ፍትሒ ኣመሪካ ኣፍሊጡ።
እቲ ናይ ብሪጣንያ ዜግነት ዘለዎ ኤርትራዊ ሃብቶም፣ ብመንገዲ ዱባይ፣ ደቡብን ማእከላይን ላቲን ኣመሪካን ሜክሲኮን ኣቢሉ ንሓያሎ ኤርትራውያን ኢትዮጵያውያንን ናብ ኣመሪካ ከምዘስገሮም’ዩ ክሲ ቀሪብሉ ዘሎ።
በዚ ሓደ ካብ ከብደቲ ገበናት እናተባህለ ዝግለጸ ዘሎ ምስግጋር ደቂ ሰብ ዝተጠርጠረ ወዲ 47 ዓመት ሃብቶም፣ ብ25 ሚያዝያ ናብ ኣመሪካ ድሕሪ ምእታዉ’ዩ ብኡ ንብኡ ናብ ቤት ፍርዲ ቀሪቡ።
More Articles...
