c


ዜና ኤርትራ

ጃፓን ኣብ ጅቡቲ ዝርከብ ወትሃደራዊ መዓስከራ ከተስፍሕ'ያ፣ ህንዲ'ውን ክትጥቀመሉ'ያ

Radio Erena: 16 November 2018

Indo Japan

ጃፓን፣ ካብ 2015 ኣትሒዛ ብ ጅቡቲ ዝሃነጸቶ ወትህድራዊ መዓስከር ከተስፍሕ ምዃና ተገሊጹ።

እዚ ኣብ ጅቡቲ ዝርከብ ወትሃደራዊ መዓስከር ጃፓን፣ ህንዲ'ውን ክትጥቐመሉ ምዃና መርበባት ሓበሬታ ክልትኤን ሃገራት ይገልጻ ኣለዋ።

እዚ ዝግለጽ ዘሎ፣ ኣብ ከተማ ቶክዮ ኣብ ዝተቓንዐ መበል 13 ዋዕላ ጃፓንን ህንድን፣ ቀዳማይ ሚኒስተር ጃፓን ሺንዞ ኣበ ምስ ህንዳዊ መዘንኡ ናረንድራ ሞዲ ብምርኻብ ኣብ ንግዳውን ወትሃደራውያን ጉዳያት ክተሓጋገዙ ድሕሪ ዝበጽሕዎ ስምምዕ'ዩ።

ጃፓን፣ ጎኒ ጎኒ'ቲ ናይ ቻይና ተበግሶ፣ ኣብ ጅቡቲ ወትሃደራዊ መዓስከር ምኽፋታ ዝዝከር ኮይኑ፣ ኣብዚ እዋን'ዚ ድማ ምስ ህንዲ ብምልፋን፣ ኣብቲ መዓስከር ክተሓጋገዛ ተወሳኺ ምይይጥ ኣብ ምክያድ ከምዝርከባ'ዩ ዝንገር።

Read more...

ባይቶ ጸጥታ፣ ኣብ ልዕሊ ኤርትራ ንትሽዓተ ዓመታት ኣጽኒዕዎ ዝጸንሐ እገዳ ኣልዒልዎ

Radio Erena: 15 November 2018

eri_unscባይቶ ጸጥታ ሕቡራት ሃገራት፣ ኣብ ልዕሊ ኤርትራ ንትሽዓተ ዓመታት ኣጽኒዕዎ ዝጸንሐ እገዳ ትማሊ ሮቡዕ 14 ሕዳር ኣብ ዘካየዶ ኣኼባ ኣልዒልዎ።

ባይቶ ጸጥታ፣ ነቲ እገዳ ዘልዕል ዘሎ ናይ ሓሙሽተ ቀወምትን 10 ዘይቀወምትን ኣባላት እቲ ባይቶ ምሉእ ድጋፍ ብምርካብ'ዩ።

እቲ ባይቶ፣ ኣቐዲሙ ብብሪጣንያ ንዝቐረበ ንድፊ ከምዘለዎ ብምቕባል፣ ኣብ ልዕሊ መንግስቲ ኤርትራ ዝተነብረ ናይ ኣጽዋር እገዳ ይኹን ካልእ ምስ መገሻ ሰበ ስልጣናትን ምድስካል ኣብ ወጻኢ ዝርከብ ንብረትን ብምሉኡ ክእለ ወሲኑ ኣሎ።

ብዘይካ'ዚ፣ እቲ ባይቶ ንዕማም ተቖጻጻሪ ጉጅለ ናብ ናይ ክኢላታት ፓነል (መኣዲ ዘተ) ኣውሪድዎ ኣሎ።

Read more...

ፕረዚደንታት ፈረንሳን ጅቡቲን ኣብ ሓድሽ ምዕባለታት ዞባ ቀርኒ ኣፍሪቃ ተመያይጦም

Radio Erena: 14 November 2018

French Djibouti

ኣብ ፈረንሳ፣ ናይ ስራሕ ምብጻሕ ዝፈጸመ ፕረዚደንት ጅቡቲ እስማዒል ዑመር ገለ ብዛዕባ'ቲ ኣብ ዞባ ቀርኒ ኣፍሪቃ ተኸስቲቱ ዘሎ ሓድሽ ምዕባለታትን ዝምድና ምስ ኤርትራን ብዝምልክት ምስ ፕረዚደንት ኢማኑዌል ማክሮን ከምዝተዘራረቡ ዲፕሎማስያውያን ምንጭታት ሓቢሮም።

ፕረዚደንት ገለ፣ 11 ሕዳር ኣብ ዝተኻየደ ጽምብል ምዝዛም ቀዳማይ ኵናት ዓለም ንምስታፍ ናብ ፓሪስ ድሕሪ ምእታዉ'ዩ ምስ ፕረዚደንት ማክሮን ምይይጥ ዘካየደ።

ክልቲኦም ፕረዚደንታት ኣብ ዘካየድዎ ዝርርብ፣ ታሪኻዊ ዝምድና ፈረንሳን ጅቡቲን ሕጂ ዘለዎ መድረኻትን ድሕሪ ምግምጋም፣ ኣብቲ ዞባ ብቀዳማይ ሚኒስተር ኢትዮጵያ ኣብይ ኣሕመድ ዝተወስደ ናይ ሰላም ተበግሶን ጅቡቲ ዘለዋ መርገጽን ተመያይጦም።

ብዘይካ'ዚ ኤርትራን ጅቡትን ዘለወን ዘይተፈትሐ ጉዳያት ብምዝምልክተ ድሕሪ ምዝርራብ፣ ምልዓል ኣብ ልዕሊ ኤርትራ ዝተነብረ እገዳ ዘትየሙሉ።

Read more...

ዞባ ማእከል፣ ኣባላት ህዝባዊ ሰራዊት ታዕሊም ከካይዱ'ዮም

Radio Erena: 15 November 2018

hizbawi serawitኣብ ዞባ ማእከል ዝርከቡ ኣባላት ህዝባዊ ሰራዊት፣ ኣብ ቀዳመ ሰንበት ዘካይድዎ ዝነበሩ ታዕሊም ክቕጽል ትእዛዝ ተመሓላሊፉ ከምዘሎ ተሓቢሩ።

እቲ ብምምሕዳራት ተዘርጊሑ ዘሎ ትእዛዝ፣ ኣብ ትሕቲ ክፍለ ሰራዊት 59 ዝተጠርነፉ ኣባላት ህዝባዊ ሰራዊት ከባቢ ኣስመራ፣ ኣብ ኤክስቦ ዘካይድዎ ዝነበሩ ታዕሊም ክቕጽል ምዃኑ ዘዘኻኽር'ዩ።

እቶም ብስም ዑቕር ሰራዊት ዝፍለጡ ዝነበሩ ድሒሮም ድማ ህዝባዊ ሰራዊት ዝተሰምዩ፣ መብዛሕቶም ልዕሊ ዕድመ ዝኾኑ ኣቦታትን ኣቦሓጎታትን፣ ድሕሪ'ቲ ምስ ኢትዮጵያ ተጀሚሩ ዝተባህለ ሰላም፣ ብረቶም ከረክቡ ምዃኖም'ዩ ክሕበሮም ጸኒሑ።

ይኹን'ምበር ብመሰረት ካብ ኣስመራ ዝረኸብናዮ መረጋገጺ፣ እቶም ኣባላት ህዝባዊ ሰራዊት ካብ ሰንበት 12 ሕዳር ኣትሒዞም ነፍሲ ወከፍ ሰንበት ዝቕጽል ታዕሊም ጀሚሮም ኣለዉ።

Read more...

ባንክ ልምዓት ኣፍሪቃ፣ ንሃገራት ምብራቕ ኣፍሪቃ፣ 2 ቢልዮን ዶላር ክምውል'ዩ

Radio Erena: 14 November 2018

AFDB

ባንክ ልምዓት ኣፍሪቃ፣ ንሃገራት ምብራቕ ኣፍሪቃ፣ 2 ቢልዮን ዶላር ክምውል'ዩ ምዃኑ ተሓቢሩ።

እቲ ምወላ፣ ኣብ ምህናጽ፣ ዝተፈላለየ ናይ ትሕተ ቅርጺ ፕሮጀክታት ክውዕል ምዃኑ ማዕከን ዜና ዘ ኢስት ኣፍሪካ ኣፍሊጡ።

ካብዚ ምውላ ቀንዲ ተረባሕቲ ዝኾና ሃገራት፣ ኤርትራ፣ ኢትዮጵያ፣ ጅቡቲ፣ ሶማል፣ ሱዳንን ሲሸልስን'የን።

እቲ ንኣርባዕተ ዓመታት ተመዲቡ ዘሎ ምውላ፣ ናብ 3 ቢልዮን ክዓቢ ተኽእሎ ከምዘሎ'ውን ሰበ ስልጣን ናይቲ ባንክ ይእምቱ።

ኣውራ ዕላማ እቲ ምወላ፣ ነቲ ኣብ መንጎ ሃገራት ምብራቕ ኣፍሪቃ ዘሎ ምንቅስቃስ ሰባትን ንግድን ከምኡ'ውን ምምዕባል ፊናንሲያውያን ትካላን ንምቅልጣፍ ምዃኑ ዋና ዳይረክተር ናይቲ ባንክ ኣብቲ ዞባ ኔና ኑዋብፎ ኣነጺራ።

Read more...




Powered by Joomla!®. Designed by: free hosting no ads resell dot me domains Valid XHTML and CSS.