c


ዜና ኤርትራ

ኣብ ማንቸስተር ኣብ መንጎ ኤርትራውያን ብዝተጎሃሃረ ናዕቢ ብውሑዱ ሸሞንተ ሰባት ብፎኪስ ቆሲሎም

Radio Erena: 17 June 2018

manchester rebeshaኣብ ማንቸስተር ኣብ መንጎ ኤርትራውያን ብዝተጎሃሃረ ናዕቢ ብውሑዱ ሸሞንተ ሰባት ብፎኪስ ከምዝቖሰሉ ማዕከን ሓበሬታ ማንቸስተር ኢቭኒን ኒውስ ኣፍሊጡ።

ኣብቲ ብቀዳም 16 ሰነ ኣብ ሓደ ናይ ቅድድም ብሽክለታ ፌስቲቫል ዝካየደሉ ዝነበረ ኣጋጣሚ ዝተላዕለ ግጭት፣ ኣብ ኣፍደገ’ቲ ስዳድዩም ተኣኪቦም ዝቃወሙ ዝነበሩ ኤርትራውያን ናብ ውሽጢ ብምእታው ኣብ ልዕሊ’ቶም ዝሳተፉ ዝነበሩ ካልኦት ኤርትራውያን ድሕሪ ዘካየዱዎ መጥቃዕቲ ከምዝተበገሰ፣ እቲ ማዕከን ሓበሬታ ብተወሳኺ የረድእ።

ፖሊስ’ታ ከተማ ኣብ ዝሃቦ ቃል፣ ከባቢ ሰዓት ሰለስተ ኣብቲ ስዳድዩም ዕግርግር ከምዝተላዕለ ኣብ ዝተሓበረሉ እዋን ብኡ ንብኡ ኣኽበርቲ ጸጥታ ብምውፋር ነቲ ኩነታት ከህድኦ ከምዝኸኣለ ሓቢሩ። ካብቶም ቁጽሮም ከባቢ ሰላሳ ክኾኑ ዝኽእሉ ተቓውሞ ዘካየዱ ኤርትራውያን ሓያሎ ኣብ ትሕቲ ቀይዲ ፖሊስ ኣትዮም ከምዘለዉ’ውን ይገልጽ።

Read more...

ኢትዮጵያ፣ ኣብ ሓደ ወርሒ ልዕሊ 2 ሽሕ ኤርትራውያን ዶብ ብምስጋር ዑቕባ ከምዝሓተቱ UNHCR ገሊጹ

Radio Erena: 15 June 2018

refugees in ethiopia

ኣብዛ ዝሓለፈት ወርሒ ግንቦት ጥራይ ልዕሊ 2 ሽሕ ኤርትራውያን ዶብ ብምስጋር ኣብ ኢትዮጵያ ዑቕባ ከምዝሓተቱ ንመግለጺ ወኪል ላዕለዋይ ኮሚሽን ስደተኛታት ሕቡራት ሃገራት UNHCR ካብ ኣዲስ ኣበባ ብምጥቃስ ኣገልግሎት ዜና ቻይና ሺንሁዋ ሓቢሩ።

እቲ ወኪል ስደተኛታት ዝሓለፈ ሰሙን ኣብ ዝሃቦ መግለጺ፣ ኣብዘን ዝሓለፋ 5 ኣዋርሕ ናይ 2018ብድምር 29,211 ስደተኛታት ዝተፈላለያ ሃገራት ናብ ኢትዮጵያ ከምዝኣተዉ ብምጥቃስ፣ እዚ ቁጽሪ'ዚ ንጠቕላላ ብዝሒ ናይቶም ኣብ ኢትዮጵያ ዝርከቡ ስደተኛታት ናብ ልዕሊ 900 ሽሕ ክብ ከምዘበሎ ኣፍሊጡ።

ኣብ ወርሒ ግንቦት ናይ 2018 ጥራይ፣ 4436 ስደተኛታት ናብ ኢትዮጵያ ከምዝኣተዉ ዘመልከተ እቲ መግለጺ፣ እቶም 2157 ዜጋታት ደቡብ ሱዳን ክኾኑ እንከለዉ እቶም 2094 ከኣ ኤርትራውያን ምዃኖም ኣስሚርሉ።

Read more...

ኤርትራ፣ ሩስያዊ ትካል፣ ኣብ ደንካልያ ናይ ዝፈሪ ፖታሽ ውዕል ንግዲ ይኽትም

Radio Erena: 14 June 2018

eurochዋንነቱ ናይ ሩስያ ዝኾነ ትካል "ኤሮከም -EuroChem” ኣብ ኤርትራ፣ ኣብ ዳንካልያ፣ ከባቢ ኮሉሊ፣ ዕደና ምስ ዘካይድ ዘሎ ናይ ኣውስትራልያ ኩባንያ ዳናካሊ፣ ውዕል ንግዲ ፖታሽ ከምዝተሰማምዐ ብሰሉስ 12 ሰነ ኣብ ዝዘርግሖ መግለጺ ኣፍሊጡ።

እቲ ኣብ ምፍራይ ድዅዒን ካልእ ከሚካላዊ ትሕዝቶ ዘለዎ ቀመማትን ኣብ ምፍራይ ዝነጥፍ ትካል፣ ኣብ ኤርትራ ንዝፈሪ ፖታሽ ናይ ምሻጥን ምክፍፋልን ምሉእ መሰል ክህልዎ'ዩ ውዕል ኣትዩ ዘሎ።

እቲ ናይ ንግዲ ውዕል፣ ውጽኢቱ ተራእዩ ኣብ ነፍሲ ወከፍ ሰለስተ ዓመታት ዝሕድስ'ዩ።

Read more...

እስራኤል፣ ጓል ሽዱሽተ ዓመት ኤርትራዊት ቆልዓ ዝዓመጸ ጥርጡር ተኣሲሩ

Radio Erena: 15 June 2018

Haktiva Israel

ኣብ እስራኤል፣ ንጓል ሽዱሽተ ዓመት ኤርትራዊት ቆልዓ ዝዓመጸ ጥርጡር ኣብ ቀይዲ ከምዝኣተወ ማዕከን ዜና ሃረጽ ሓቢሩ።

እቲ ኣቪ ጌታ ዝተባህለ ወዲ 48 ዓመት እስራኤላዊ፣ ነታ ካብ ሓተቲ ዑቕባ ዝኾኑ ኤርትራውያን ዝተወልደት ቆልዓ፣ ሃቲክቫ ኣብ ዝተባህለ ከባቢ ደቡብ ቴልኣቪቭ፣ ኣብ ዝርከብ ህንጻ ብምውሳድ ከምዝዓመጻ'ዩ ተኸሲሱ ዘሎ።

ጌታ፣ ድሕሪ'ቲ ዝፈጸሞ ኣነዋሪ በደል ብኡ ንብኡ ከምዝተታሕዘ ፖሊስ እስራኤል ይገልጽ።

እዚ ተኸታታሊ ጾታዊ ዓመጽ ብምፍጻሙ ተኸሲሱ ዘሎ እስራኤላዊ፣ ኣቐዲሙ'ውን ብተመሳሳሊ ገበን ን14 ዓመታት ዝተኣሰረን ፍሉይ መከታተሊ ተጌርሉ ካብ ቤት ማእሰርቲ ከምዝተፋነወን ጸብጻብ ሃረጽ የመልክት።

Read more...

ሆላንድ፣ ኣደን ጓል ሽዱሽተ ዓመት ጓላን ዝቐተለ ኤርትራዊ ን20 ዓመታት ክእሰር ተፈሪዱ

Radio Erena: 13 June 2018

Holland

ኣብ ሆላንድ፣ ግሊመን ኣብ ዝተባህለ ቦታ፣ ንኣደን ጓል ሽዱሽተ ዓመት ጓላን ዝቐተለ ኤርትራዊ መንእሰይ ን20 ዓመታት ክእሰር ከምዝተፈርደ መርበባት ሓበሬታ ካብታ ሃገር ሓቢረን።

እቲ ስሙ ዘይተጠቕሰ ወዲ 20 ዓመት ኤርትራዊ መንእሰይ፣ ነታ 23 ዝዓመታ ዓርኩን ጓል ሽዱሽተ ዓመት ጓላን ዝቐተለሉ ምኽንያት፣ ዝነበሮም ፍቕራዊ ዝምድና ከተቋርጾ ድሕሪ ምውሳና ተቖጢዑ ከምዝፈጸሞ'ዩ ዝገልጽ።

ነታ ኣደ ብናይ ኤሌክትሪክ ገመድ ሓኒቑ ብኻራ ክቐትላ እንከሎ ነታ ቆልዓ ድማ ዓፊኑ ከምዝቐተላ ፖሊስ ሆላንድ ከምዝቐተለ ጸብጻብ ፖሊስ ይጠቕስ።

Read more...




Powered by Joomla!®. Designed by: free hosting no ads resell dot me domains Valid XHTML and CSS.