c


ዜና ኤርትራ

ኤርትራ መሪሕነት ካርቱም ፕሮሰስ ክትርከብ’ያ

Radio Erena: 02 December 2018

khatoum procesኤርትራ መሪሕነት ናይቲ ብካርቱም ፕሮሰስ ዝፍለጥ ዝምድና ሕብረት ኤውሮጳን ሃገራት ምብራቕ ኣፍሪቃን ክትርከብ’ያ።

ምንጭታት ዜና ካብ ኤውሮጳዊ ሕብረት ከምዝሓበሩዎ፣ ነቲ ኣብ መጀመሪያ ኣዋርሕ 2019 ክካየድ ተመዲቡ ዘሎ ምትሕልላፍ ስልጣን፣ ሓያሎ ተጣበቕቲ መሰላትን ዲፕሎማሰኛታትን ድሮ ተቓውሞታቶም ኣስሚዖም ኣለዉ።

ኣባላት ካርቱም ፕሮሰስ፣ ኤርትራ፣ ኢትዮጵያ፣ ደቡብ ሱዳንን ሱዳንን ክኾና እንከለዋ፣ ከም ቱኒዝያን ኬንያን ዝኣመሰላ ሃገራት ከኣ ናይ ተዓዛቢ ወንበር ኣለወን።

እቲ ኣብ መንጎ ሕብረት ኤውሮጳን እዘን ብብዝሒ ስደተኛታት ዘፍርያ ሃገራትን ዝካየድ ምትሕብባር፣ ስደተኛታት ምብራቕ ኣፍሪቃ ናብ ኤውሮጳ ካብ ምስጋር ዝኽልክል መስመራት ንምዕጻው ዝተፈላለየ ፕሮጀክታት ዝምውል እዩ።

Read more...

መጓዓዝያ ዞባ ማእከል፣ ብሰንኪ ብልሽዉ ምሕደራ፣ ከቢድ ክሳራታት ኣጋጢምዎ

Radio Erena: 30 November 2018

Bus zoba makel

ኣብ ኤርትራ፣ ዞባ ማእከል፣ ህዝባዊ ኣገልግሎታት መጓዓዝያ ኣብ ምሃብ ዝርከብ መንግስታዊ ትካል፣ ብሰንኪ ብልሽውና ከቢድ ክሳራታት ወሪድዎ።

እቲ ትካል ብሰንኪ ዘጋጠሞ ኣስታት 60 ሚልዮን ናቕፋ ዝግመት ክሳራ፣ ልዕሊ 400 ሰራሕተኛታቱ ከምዝሰጎገ ምስቲ ትካል ቅርበት ዘለዎም ምንጭታት ንሬድዮ ኤረና ሓቢሮም።

ኣውራ ጠንቂ ናይዚ ድማ፣ ሰኣን ብቁዕ ምሕደራን ኣብ ትካላት መንግስትን ህግደፍን ሳዕሪሩ ዘሎ ብልሽውናን ምጥፍፋእን ምዃኑ'ዮም እቶም ነዚ ሓበሬታ ዝልኣኹ ምንጭታት ዘረድኡ።

ካብ ኣስመራ ተበጊሱ ክሳብ መርሓኖ፣ ሕምብርቲ፣ ዓዶጓዕዳ፣ ቁሸትን ካልእ ከባቢ ዓድታት ናይቲ ዞባ ብተዛማዲ ዝሓሸ ኣገልግሎታት ናይ መጓዓዝያ ክህብ ዝጸንሐ እቲ ትካል ኣብዚ እዋን'ዚ ተሰናኺሉ፣ ህዝቢ ብስእነት መጓዓዝያ ከማርር ይስማዕ ኣሎ።

Read more...

እስራኤል፣ ብቅትለት ጓል 12 ዓመት ኤርትራዊት ቆልዓ ክህደን ዝጸንሐ መንእሰያት ተታሒዙ

Radio Erena; 29 November 2018

Sylvana

ኣብ እስራኤል፣ ከተማ ቴልኣቪቭ፣ ብቅትለት ጓል 12 ዓመት ኤርትራዊት ቆልዓ ክህደን ዝጸንሐ፣ ተስፋብርሃን ተስፋጽዮን ዝተባህለ ኤርትራዊ መንእሰይ ተታሒዙ።

እቲ መጻምድ'ቲ ኣዲኣ ምዃኑ ዝተንግረሉ ተስፋብርሃን፣ ነታ ሲልቫና ጸጋይ ዝተባህለት ጓል 12 ዓመት ቆልዓ፣ ብሰኑይ 26 ሕዳር ድሕሪ ምቕታል ከምዝተሰወረ'ዩ ክግጽ ጸኒሑ።

ይኹን'ምበር ድሕሪ ክልተ መዓልታት ኣብ ቀይዲ ከምዝወዓለ ንፖሊስ እስራኤል ብምጥቃስ ታይምስ ኦፍ እስራኤል ሓቢራ።

ሲልቫና ጸጋይ፣ ወላዲታ ኣብ ስራሕ ስለእትውዕል፣ መጻምድቲ ኣዲኣ ዝነበረ ተስፋብርሃን ብተደጋጋሚ የፈራርሓ ከምዝነበረን፣ ክልተ መዓልታት ቅድሚ ሞታ ናብ ፖሊስ እስራኤል ብምድዋል ሓቢራ ምንባራ ዝተፈላለዩ ወገናት የመልክቱ።

Read more...

ኣዲስ ኣበባ፣ ዋሕዲ ነዳዲ እናበኣሰ ይመጽእ

Radio Erena: 30 November 2018

Addis Abeba fuel shortage

ኣብ ከተማ ኣዲስ ኣበባን ከባቢኣን ዋሕዲ ነዳዲ ብፍላይ ድማ ቤንዚን እናገደደ ይመጽእ ከምዘሎ ጋዜጣ ሪፖርተር ሓቢራ።

እታ ጋዜጣን ንሓላፊ ትካል ኣቕራቢ ነዳዲ ኢትዮጵያ ኣቶ ታደሰ ሃይለማርያም ብምጥቃስ ኣብ ዘቕረብቶ ጸብጻብ፣ ኣውራ ምኽንያት ናይዚ ኣብ ኣዲስ ኣበባ ተራእዩ ዘሎ ዋሕዶ ነዳዲ፣ ዘይሕጋዊ መሸጣ'ዩ።

መንግስቲ ናብ መዐደሊ ነቑጣታት ዘከፋፈሎ ነዳዲ፣ ብዘይሕጋዊ መንገዲ ይሽየጥ እኳ እንተሎ፣ ነዚ ንምቁጽጻር ዝተወስደ ስጉምቲ ብዘይምህላዉ፣ እቲ ዋሕዲ ካብ ዝሓለፈ ወርሒ ብዝያዳ ብኢሱ ምህላዉ ተገሊጹ።

ካብዘን መዐደሊ ነቑጣታት፣ ብለይቲ ብበራሚል ተጻዒኑ ብብዝሒ ነዳዲ ይጓረት ከምዘሎ'ውን እቲ ጸብጻብ ኣተሓሳሲቡ።

መንግስቲ ኢትዮጵያ፣ እኹል ቀረብ ነዳዲ ከምዘሎ እኳ እንተጠቐሰ፣ ብወደብ ዝኣተወ ነዳዲ ኣብ ምብጽጻሕ ግና ምድንጓይ ከምዝርአ ካልኦት ወገናት የመልክቱ።

Read more...

ስዊዘርላንድ፣ ብባርዕ ዝሞቱ ሽዱሽተ ሰባት፣ ክልተ ቆልዑ ዝርከብዎም ዜጋታት ኤርትራን ኢትዮጵያን'ዮም

Radio Erena: 28 November 2018

Swiss fire2

ብሰኑይ 26 ሕዳር ኣብ ስዊዘርላንድ፣ ካንቶና ሶሎተርን፣ ሓተቲ ዑቕባን ስደተኛታትን ኣብ ዝነብርሉ ህንጻ፣ ብዘጋጠመ ባርዕ ዝሞቱ ሽዱሽተ ሰባት ዜጋታት ኤርትራን ምዃኖም ተገሊጹ።

ክልተ ካብቶም ግዳያት ቆልዑ'ዮም። 

ጠንቂ'ቲ ባርዕ፣ ብግቡእ ዘይጠፍአ ሽጋራ ምዃኑ መባእታዊ ጸብጻብ ፖሊስ ከምዘሎ ማዕከን ዜና ስዊስ ኢንፎ ይጠቅስ።

ካብቲ ባርዕ ምስ ውላዳ ንምህዳን ዝፈተነት ክትከውን እትኽእል ዝተገልጸት ኣደ'ውን ኣብ ኣፍደገ 'ቲ በዓል ኣርባዕተ ደርቢ ህንጻ ሞይታ ክትርከብ እንከላ፣ እቲ ቆልዓ ግና ብህይወት ድሒኑ ኣሎ።

ቁጽሮም ብልክዕ ዘይተገልጸ ዝቖሰሉ ሰባት'ውን፣ ኣብ ሆስፒታል ተዓቝቦም ኣለዉ።

Read more...




Powered by Joomla!®. Designed by: free hosting no ads resell dot me domains Valid XHTML and CSS.