c


ሑቲ፣ ብሰብ ኣልቦ በራሪ ብዘካየዶ መጥቃዕቲ፣ ሓያሎ ወትሃደራት የመን ተቐቲሎም

Radio Erena: 11 January 2019

houthi

ሑቲ፣ ብሰብ ኣልቦ በራሪ (ድሮን) ብዘካየዶ መጥቃዕቲ፣ ኣብ ሰልፊ ዝነበሩ ብውሕዱ ሓሙሽተ ወትሃደራት መንግስቲ የመን ከምዝቐተለ ማዕከናት ዜና ሓቢረን።

እቲ ብሓሙስ 10 ታሕሳስ፣ ኣብ ወትሃደራዊ መዓስከር ኣል ዓናድ ዝተኻየደ ናይ ድሮን መጥቃዕቲ ሑቲ፣ ንጠቕላሊ ሓለቓ ስታፍ ሰራዊት መንግስቲ የመን ንምቕታል ዝዓለመ'ዩ።

እቲ ላዕለዋይ ወትሃደራዊ ኣዛዚ የመን፣ ካብቲ ሞት ክድሕን እኳ እንተኸኣለ፣ ንሱ ዝርከቦም 20 ካልኦት ቆሲሎም ኣብ ሕክምና ከምዘለዉ ጸብጻብ ኣልጀዚራ ኣገንዚቡ።

ሑቲ፣ ጠቕላሊ ሓለቓ ስታፍ ሰራዊት የመን ኣብቲ ኣብ ከባቢ ዓደን፣ ዞባ ላሒጅ ዝርከብ ወትሃደራዊ መዓስክር ክበጽሕ ምዃኑ ስለያዊ ሓበሬታ ድሕሪ ምርካቡ ነቲ ናይ ድሮን መጥቃዕቲ ከምዝወደቦ ኣፍሊጡ።

ኣስታት ሓደ ኩንታል ዝምዘን ቦምብ፣ ኣብ ሰብ ኣልቦ በራሪ (ድሮን) ጽዒኑ ድሕሪ ምልኣኹ፣ ኣብቲ መዓስከር ምስ በጽሐ ከምዝተፈንጀረ ኣረጋጊጹ።

ስዑዲ ዓረብን ሕቡራት ኢማራትን ንሑቲ ንምብርኻኽ ዘካየድኦ ናይ ሰለስተ ዓመታት ወትሃደራዊ መጥቃዕቲ ክዕወት ብዘይምኽኣሉ፣ ፖለቲካዊ ፍታሕ ንምንዳይ ምስቲ ኣብ ስደት፣ ኣብ ሪያድ ዝርከብ መንግስቲ ዘተ ንምክያድ፣ ብመንጎኝነት ሕቡራት ሃገራት ተጀሚሩ ከምዘሎ ይፍለጥ።

===============

Share this post

Submit to FacebookSubmit to Google PlusSubmit to TwitterSubmit to LinkedIn



Powered by Joomla!®. Designed by: free hosting no ads resell dot me domains Valid XHTML and CSS.