Welcome to Radio Erena!
ኣብ መበል 24 ዋዕላ ሕብረት ኣፍሪቃ ዝተሳተፈ ወኪል መንግስቲ ኤርትራ፣ ዶብ ኤርትራን ኢትዮጵያን ክሕንጸጽ እቲ ሕብረት ጸቕጢ ክገብር ጸዊዑ
Radio Erena: 04 February 2015
ኣብ ኣዲስ ኣበባ ኣብ ዝተኻየደ መበል 24 ዋዕላ ሕብረት ኣፍሪቃ ብመንገዲ ኣምባሳደር ኣርኣያ ደስታ ዝተሳተፈት ኤርትራ፣ ምሕንጻጽ ዶባት ኤርትራን ኢትዮጵያን ክትግበር ከምዝጸወዐት ዘ ሪፖርተር ካብታ ከተማ ሓቢሩ።
መንግስቲ ኤርትራ ነቲ ብመንገዲ ኣብ ኣዲስ ኣበባ ዝርከብ ሕብረት ኣፍሪቃ ቀዋሚ ኣምባሳደሩ ዝኾነ ኣቶ ኣርኣያ ደስታ ኣቢሉ ናብ ተጋባእቲ ኣብ ዘቕረቦ ጻውዒት፣ ብመሰረት እቲ ብኮሚሽን ዶብ ዝተዋህበ ውሳኔ፣ ዶብ ኤርትራን ኢትዮጵያን ክሕንጸጽን ሰራዊት ኢትዮጵያ ድማ ካብቲ ሉኣላዊ መሬት ኤርትራ ምዃኑ ዝተረጋገጸ ክፋላት ክስሕብን ሕብረት ኣፍሪቃ ጸቕጢ ክገብር’ዩ ጸዊዑ።
ኣብ ሊብያ ዝካየድ ዘሎ ግጭት ንዋሕዚ ስደተኛታት ክገትኦ ከምዝኽእል ተገሊጹ
Radio Erena: 04 February 2015
ኣብ ሊብያ ዝካየድ ዘሎ ግጭትን ኣብ ልዕሊ በቲ መንገዲ ናብ ኤውሮጳ ንምስጋር ዝፍትኑ ስደተኛታት ዝፍጸም ዘሎ ጭውያን ንዋሕዚ ኣፍሪቃውያን ስደተኛታት ናብ ሃገራት ኤውሮጳ ክቕንሶ ከምዝኽእል ተገሊጹ።
ክፍሊ ኢሚግሬሽንን ስደተኛታትን ናይታ ምስ ዘለዋ ብዝሒ ህዝቢ ብምንጽጻር ኣብ ኤውሮጳ ዝበዝሑ ስደተኛታት ዝተቐበለት ሽወደን፣ ብዛዕባ'ዚ ኣመልኪቱ ኣብ ዝሃቦ ሓበሬታ፣ ኣብ ሊብያ ዝቕጽል ዘሎ ግጭት ነቲ ኣውራ መሰጋገሪ መንገዲ ስደተኛታት ናብ ኤውሮጳ ክዓጽዎ ከምዝኻል ብምጥቃስ፣ ሽወደን ኣብዚ ዓመት እዚ ካብ ናይ ዝሓለፈ ዓመት ዝወሓዱ ስደተኛታት ክመጹዋ ተስፋ ምህላዉ ኣረዲኡ።
ኤርትራዊ ኣባ ሙሴ ዘርኣይ ንሽልማት ናይ ሰላም ኖቤል 2015 ካብ ዝተረቑሑ ሰባት ሓደ ምዃኖም ተሓቢሩ
Radio Erena: 03 February 2015
ብማእከላይ ባሕሪ እናሰገሩ ናብ ኤውሮጳ ንምእታው ኣብ ሓደጋ ዝወድቁ ንዘለዉ10ታት ኣሽሓት ስደተኛታት ኣብ ምሕጋዝ ዝነጥፉ ዘለዉ ኤርትራዊ ኣባ ሙሴ ዘርኣይ ሓደ ካብ ሕጹያት ሽልማት ኖቤል 2015 ምዃኖም ሮይተርስ ኣረጋጊጹ።
ኣባ ሙሴ ዘርኣይ ንሽልማት ኖቤል ካብ ዝሕጸዩ ሰባት ንክኾኑ ተኽእሎ ምህላዉ ኣብ ስዊዘርላንድ እትሕተም ጋዜጣ ኣቐዲማ ጠቒሳ ምንባራ ዝዝከር ኮይኑ፣ ሮይተርስ ትማሊ ኣብ ዝዘርግሖ ናይ ብሎግ ሓበሬታ ግና እቶም ናይ ካቶሊካዊት ቤተ ክርስትያን ቀሺ ዝኾኑ ኤርትራዊ ሓደ ካብቶም ኣብ ዝርዝር ኣስማት ሕጹያት ሰፊሮም ዘለዉ ምዃኖም ሓቢሩ።
መንግስቲ ሱዳን፣ ኤርትራውያን ስደተኛታት ናይ ምስጓግ መስርሕ ይቕጽሎ ኣሎ
Radio Erena : 03 February 2015
መንግስቲ ሱዳን፣ ካብ መዓስከራት ሸገረብን ከተማ ካርቱምን ዝገፈፎም ኤርትራውያን ናብ መንግስቲ ኤርትራ ምርካብ ይቕጽሎ ምህላዉ ምንጭታት ሬድዮ ኤረና ካብ ካርቱምን ከሰላን ኣረጋጊጾም።
ኣብ ዝሓለፈ ወርሒ ጥራይ ብመንገዲ ሓምዳይት፣ ታላታዓሸርን ኣርባዕታዓሸርን ብድምር ልዕሊ ሓደ ሚእቲ ኤርትራውያን ስደተኛታት ብግዴታ ናብ መንግስቲ ኤርትራ ከምዘረከቦም ዘረጋገጹ እቶም ምንጭታት፣ ሕጂ'ውን ቁጽሮም ብልክዕ ዘይተፈልጡ ኤርትራውያን ብሓልታት ጸጥታ ሱዳን ተታሒዞም ምህላዎም ኣመልኪቶም።
ብጻዕቒ ዝካየድ ዝነበረ ግፋ ኣብዚ እዋን'ዚ ዝሒሉ እኳ እንተሎ፣ መንግስቲ ሱዳን ሃንደበት ብዝወስዶ ስጉምታትት ሓያሎ ኤርትራውያን ክኣስርን ክገፍፍን ይክእል'ዩ ዝብል ሻቕሎት ምህላዉ'ውን ኣገንዚቦም።
መንግስቲ ኤርትራ፣ 47.52 ሜጋ ዋት ሓይሊ ኤለኢክትሪክ ዘመንጭዋ ክልተ ጀነሬተራት ካብ ቻይና ንምዕዳግ ተሰማሚዑ
Radio Erena : 03 February 2015
መንግስቲ ኤርትራ ፣ንዘጋጥም ዘሎ ሕጽረት ኣገልግሎታት ኤሌክትሪክ ንምምላእ ካብ ቻይና ክልተ ተወሰኽቲ ጀነሬተራት ንምዕዳግ ስምምዕ ከቲሙ።
ክልተ ኩባንያታት ቻይና፣ ነተን ጀነሬተራት ብመሰረት ጠለብ መንግስቲ ኤርትራ ኣብ ምድላው ከምዝርከባ ነቲ ውዕል ምስ በዓል መዚ ኤሌክትሪክ ኤርትራ ዝኸተመ ሻንጋይ ኤሌክትሪክ ዝተባህለ ትካል ዝሓለፈ ወርሒ ኣብ ዘውጽኦ መግለጺ ኣፍሊጡ።
እተን ዘመናውያን ጀነሬተራት፣ ብነዳዲ ዝሰርሓ ኮይነን 47.52 ሜጋ ዋት ሓይሊ ኤሌክትሪክ ከመንጭዋ ትጽቢት ኣሎ።
More Articles...
